Rajoy: 'Ez dugu gogoko Cameron Gibraltarrera kanpaina egitera joatea'

Mariano Rajoy Espainiako jarduneko presidenteak ez du 'begionez' ikusi David Cameron Erresuma Batuko lehen ministroak Gibraltarrera, gaur, egingo duen bisita. 'Brexit'aren inguruan, datorren astean egitekoak diren erreferendumaren harira egingo du bisita Cameronek: Erresuma Batuak EBn jarraitzearen aldeko kanpaina egin du bertan.

"Gobernuak ez du gogoko Cameron jauna Gibraltarrera joatea. Erresuma Batua EB geratu ala ez dago jokoan, eta horretarako kanpaina Erresuma Batuan egin behar da, ez Gibraltarren", esan du Rajoyk, RNE irrati-katean egin dioten elkarrizketan.

Datorren asteko erreferendumean gertatuko dena gorabehera, Gibraltarrek Espainiarena izaten jarraituko duela esan du buruzagi popularrak. "Erreferendumean 'Brexit'ak galdu ala irabazi, Gibraltar Espainia da", esan du.

Erresuma Batuak EBtik irtetea erabakiko balu, hori "atzerapausoa" litzakeela iritzi dio Rajoyk. Horren ustez, 'Brexit'ak kalte handia egingo lioke Erresuma Batuko ekonomiari eta denbora asko beharko luke bere onera etortzen.

Cameronek Gibraltarrera egingo duen bisitaren harira, kexa diplomatikoren bat aurkeztu behar duen galdetuta, ezetz erantzun du Rajoyk. Asteon, Espainiako eta Erresuma Batuko enbaxadek izandako bileran, jada, agertu omen zuen Gobernu espainiarrak bere ezinegona. "Ondo baino hobeto dakite zein den gure iritzia", esan du.