Icetak PSCko ateak ireki dizkie 'umezurtz' geratu diren katalanistei

Miquel Iceta PSCko idazkari nagusiak bere alderdiko ateak ireki dizkie independentistak ez diren boto-emaile katalanistei; izan ere, bere aburuz, "umezurtz" geratu dira, beren ohiko alderdiak katalanismoa alde batera utzi baitute independentismoa besarkatzeko, PDCAT alderdiari (lehengo CDC zenari) erreferentzia eginez.

Alderdiko idazkari nagusi gisa berretsi ostean, Icetak katalanismo moderatuari dei egin dio, PSCko kongresuko osoko bilkuraren aurrean egin duen mintzaldian.

"Onartu egin behar dugu guri dagokigula independentistak ez diren betiko katalanisten ordezkari-lanak egitea, ordezkaritza-politikorik gabe geratu baitira", azaldu bere diskurtsoan.

Baieztatu duenez, PSCk balore asko partekatzen ditu proiektu sozialistarako bereganatu nahi dituen herritar horiekin: "Gu bezalako herritarrak dira, autogobernu eta finantzazio hobeak nahi dituzte, eta gure herrialdeaz harro sentitu".

Sozialisten buruak, modu horretan, lehengo CDCko boto-emaileak erakarri nahi ditu, PDCATek hartutako ibilbide independentistarekin eroso sentitzen ez direnak, eta nahiz eta autogobernu gehiago nahi duten ez duten Espainiarekin hautsi nahi.

Nuria Marin izango da PSC alderdiko bigarrena, Icetaren atzetik

L'Hospitalet de Llobregateko alkatea, Nuria Marin, izango da PSC alderdiko bigarrena, Miquel Iceta buru izango duen zuzendaritza berrian. Goizaldera arte aritu dira alderdiko sektore desberdinak hitz egiten.

Batzorde exekutibo berriaren eskemaren arabera, Iceta izango da lehen idazkaria eta Marin "lehen idazkariaren albokoa"; Nuria Parlon, berriz, udaletako politika eta hezkuntzarako arduraduna izango da. Horrez gain, Salvador Illak hartuko du antolakuntzaren ardura.

Iturri sozialisten esanetan, zuzendaritza berria -24 emakume eta 25 gizon- Iceta eta Parlonek adostu dute. Biak lehian izan ziren urriaren 15eko primarioetan Kataluniako lehen idazkari izateko, eta negoziatzen aritu dira igande goizaldera arte.