Balorazioa
Presoen aldeko martxak eduki politikoa galdu du, ATAren ustez
AGENTZIAK | ERREDAKZIOA
Horrela mintzatu da Amnistiaren aldeko eta Errepresioaren aurkako Mugimendua, presoen eskubideen alde Sarek deitutako manifestazioaren harira.
ATAk Bilbon egindako martxaren irudia. Argazkia: EITB
Sorturen estrategiarekiko kritiko den Amnistiaren aldeko eta Errepresioaren aurkako Mugimenduak (ATA) deitoratu duenez, presoen auzia "eduki politikoa" galtzen doanez, "helduko da une bat non presoen etxeratzea edo gaixo daudenen askatasuna eskatu duen gizartearen gehiengo batek, baina egindako delituak ere ordaintzeko eskatuko du, espetxe-politika malguago baten barruan".
Horrela mintzatu da kolektibo hori, presoen eskubideen alde Sarek Bilbon larunbat honetarako deitutako manifestazioaren inguruan. ATAren aburuz, urtero egin ohi duten manifestazio horrek "eduki politikoa" galdu du.
"Euskal preso politikoen bizi-baldintzak hobetzeko helburu duten dinamika guztien alde gaude", adierazi dute ATAko bozeramaileek, "azken helburutik aldentzen ez bagaitu, hau da, amnistiaren helburutik".
Sarek deitutako martxa behin amaituta, ATAk manifestazio propioa egin du larunbat arratsalde honetan Bilboko Alde Zaharrean, preso guztien amnistia eskatzeko.