Kataluniako erreferenduma
Guardia Zibilak 2,5 milioi boto-paper atzeman ditu Igualadan
Agentziak | Erredakzioa
Igualadako alkateak gezurtatu egin du hautestontziak ere konfiskatu dituztela. Herritarrengan "etsipena" eragiteko operazioa izan dela ohartarazi du.
Guardia Zibilak Tarragonako inprimategi batean egindako operazioa. Artxiboko argazkia: EFE
Guardia Zibilak 2.500.000 boto-paper, 4.000.000 gutun-azal eta 100 hautestontzi atzeman omen ditu Igualadako (Bartzelona) biltegi batean, EFE berri-agentziak polizia iturriak aipatuta zabaldu duenez.
Alabaina, Marc Castells (PDeCAT) Igualadako alkateak ukatu egin du hautestontziak konfiskatu dituztela eta ohartarazi du herritarrengan "etsipena" sortzea dela polizia-operazio horren helburua.
Biltegiko arduradunek Guardia Zibilari azaldu diote hautestontzi horiek ez zirela igandeko erreferendumerako, Bartzelona futbol taldearen hauteskundeetarako prestatuta zeudela, Agusti Beneditok egungo zuzendaritzaren kontra zentsura-mozioa aurkeztu behar zuela eta.
Igualadako alkatea aipatu enpresara joan da, hango langileei babesa helarazteko eta miaketa "legearen baitan" egiten ari zirela egiaztatzeko.
Joan den irailaren 20an, ia 10 milioi boto-paper atzeman zituen Guardia Zibilak Bartzelonako Bigues i Riells herrian dagoen pabilioi batean.
Desmenteixo totalment que s'hagin requisat urnes en l'operació d'aquesta tarda a Igualada. Propaganda per desanimar-nos. Recordeu, votarem!
— Marc Castells (@marccastells) 2017(e)ko irailak 28