U-1ean milioi bat pertsonak parte hartzea arrakastatzat joko luke ANCk

Urriaren 1erako Katalunian egitea aurreikusita dagoen erreferenduma saihesteko asmoz Espainiako Gobernuak orain arte egindako "presioa" kontuan izanda, galdeketa horretan milioi bat pertsonak parte hartzea "erabateko arrakasta" izango litzatekeela nabarmendu du larunbat honetan Jordi Sanchez Kataluniako Asanblea Nazionaleko (ANC) presidenteak.

Jordi Cuixart Omnium Cultural erakundeko presidentearekin batera Mediaproren International Press and Broadcasting Center egoitzan egindako agerraldian egin ditu adierazpen horiek Sanchezek, Generalitateak igande honetarako deitutako erreferendumaren bezperan.

ANC erakundeko presidenteak gogor kritikatu du Espainiako Gobernuak erreferendumarekiko izan duen jarrera, eta orain arte egindako presioaren eraginez "parte-hartze handia lortzea zaila izango da", aitortu du. Horrela, igandean botoa eman ahal izatea "egitandi gogoangarria" izan daitekeela ohartarazi du.

"Ahal beste pertsona parte hartzea nahi dugu, baina Espainiako Gobernuaren presioak gauzak zailtzen ditu. Milioi bat pertsonak parte hartzea erabateko arrakasta izango litzateke, baina datu hori gainditzeko lanean jarraitzen dugu", esan du Sanchezek.

Horren esanetan, nahiz eta milioi bat pertsonak parte hartu, baietza gailentzen bada, Kataluniako Gobernuak aurrera jarraituko du aurreikusitako bidearekin, "zalantzarik gabe". Alabaina, erabaki bat hartu aurretik U-1eko emaitzak aztertu beharko dituztela gaineratu du.

"Kataluniako Gobernuak eta Parlamentuak aintzat hartu beharko dute hautetsontzietan gailentzen den erabakia", azaldu du Sanchezek. Halere, ez du erreferendumari buruzko baloraziorik egin nahi izan oraindik, eta igande gauean hitz egingo duela gaineratu du.

Bestalde, boto-emaileen erdiak eta batek gehiagok "bai" bozkatuko balute, independentzia aldarrikatuko luketela esan du Cuixartek, Parlamentuak onartutako legean aurreikusi bezala. Hala, emaitzak ezartzeko Espainiako Estatuarekin "negoziazio-epea" irekiko dela azaldu du.

Dena dela, 2014ko azaroaren 9an egindako galdeketarekin alderatuta, oraingoan parte-hartze txikiagoa izatea aurreikusi dute, egun hartan 2,3 milioi katalanek eman baitzuten botoa.

Informatika zerbitzuak bertan behera utzi izanak ez du eraginik izango

Bestalde, Guardia Zibila CTTI Kataluniako Telekomunikazio Zentrora joan eta urriaren 1ean botoa emateko baliatu daitezkeen aplikazio informatikoak desaktibatzeko agindua eman duten arren, "erreferendumean ez du inolako eraginik izango", ziurtatu du Jordi Cuixart Omnium Cultural erakundeko presidenteak.

Cuixarten hitzetan, Kataluniako Gobernua ez da harritu Mercedes Armas epaileak bart kaleratutako auto horren aurrean, galdeketa-egunean erabil daitezkeen 29 aplikazio informatiko horiek desaktibatzeko agindua emanez.

"Kataluniako Gobernua ez da asko harritu erabaki horren aurrean, baina haserrea eragin dio delitu gisa sailkatuta ez dagoen eta guztiz legala den gauza bat (erreferenduma) debekatzeko asmoz Estatuko segurtasun indarrek zerbitzu publikoak erabili izana", esan du Cuixartek.

Ildo horretatik, igande honetan hautesleku guztietan boto-paperak eta hautetsontziak egongo direla ziurtatu du Kataluniako Gobernuak, eta U-1ean boto elektronikoa bertan behera uzteko asmoz Espainiako Gobernuak "milioika euro bidegabe erabiltzea" deitoratu du Omnium Cultural erakundeko presidenteak.

"Ziur naiz Kataluniako Gobernuak igandean suerta litezkeen aukera guztiak aztertu dituela jada", nabarmendu du Cuixartek, eta hautesleku guztiak egun osoan zehar zabalik izateko ahalegina egin dezaten eskatu die katalanei. 09:00etan irekiko dituzte hauteslekuak.