Katalunia
Independentzia aldarrikatzeari uko egiteko exijitu dio Rajoyk Puigdemonti
Agentziak | Erredakzioa
Mariano Rajoyk esan du ezin duela Generalitateko presidentearekin elkarrizketarik izan, Espainiako Estatuari "xantaia izugarria egiten ari zaiolako".
Mariano Rajoy Espainiako Gobernuko presidentea. Argazkia: EFE
Mariano Rajoyk esan du ez duela Carles Puigdemontekin hitz egingo, Espainiako Estatuari "xantaia izugarria egiten ari zaiolako". Ildo horretan, Kataluniako presidenteak aldebakarreko independentzia aldarrikatzeari uko egin behar diola erantsi du.
Puigdemontekin bitartekari bat adostu dezala proposatu dio gaur Pablo Iglesiasek Rajoyri, telefonoz izandako elkarrizketa batean. Alabaina, Espainiako Gobernuko presidenteak baztertu egin du aukera hori.
Espainiako Gobernuaren iturriek zabaldu dutenez, Rajoyk deia eskertu dio Iglesiasi, baina Puigdemontek aldebakarreko independentzia aldarrikatzeari uko egitea beste irtenbiderik ez dagoela erantsi dio. "Hori negoziaezina da", azpimarratu du Rajoyk.
Horrenbestez, Rajoyk ez du Puigdemontekin hitz egingo, honek Espainiako Estatuari "xantaia egiteari uzten dion arte eta legalitatera itzultzen ez den bitartean".
Espainiako Gobernuko presidentea Pedro Sanchez PSOEko idazkari nagusiarekin eta Albert Rivera Ciudadanoseko presidentearekin bildu zen astelehenean Moncloan, eta Kataluniako egoerari aurre egiteko alderdi guztien proposamenak entzuteko prest dagoela esan zien, "betiere Espainiako sistema demokratikoaren defentsan".