Katalunia
ANCren eta Omniumen kontuak blokeatzeko eskatu dio Guardia Zibilak ANri
Agentziak | Erredakzioa
Bi elkarteen kontuak eta finantza produktuak blokeatzeko eskatu dio Guardia Zibilak Carmen Lamela epaileari.
Guardia zibilak Katalunian. Artxiboko irudia: EFE
Kataluniako Asanblea Nazionalaren (ANC) eta Omniumen kontuak eta finantza produktuak blokeatzeko eskatu dio gaur Guardia Zibilak Carmen Lamela Auzitegi Nazionaleko epaileari. Lamela Jordi Sanchez eta Jordi Cuixart ANCko eta Omniumeko presidenteak ikertzen ari da ustezko sedizio delitu batengatik.
Urriaren 5eko atestatua magistratuari igorri diote. Horrela, Epaileak Espainiako Bankuen Elkarteari, Espainiako Aurrezki Kutxen Konfederazioari eta Kreditu Kooperatiben Batasun Nazionalari informazio eta datu guztiak ematea agintzeko nahi du Guardia Zibilak.
Horrela, ANCrekin eta Omniumekin harremana duten transferentzia, txeke, txartel, kreditu edo mailegu eta kontu guztien inguruko informazioa bildu nahi du Guardia Zibilak, eta baita jabeak eta baimendunak identifikatu ere.
Transferentziei dagokienez, jatorrizko kontua, helmuga eta jabeak identifikatzea nahi du Guardia Zibilak, kapitalak zuritzea saihesteko araudia aplikatuz.
“Batzorde estrategikoa”
ANCko eta Omniumeko buruzagiak independentzia aldarrikatzeko “batzorde estrategikoan” kokatzen ditu Guardia Zibilak, Carles Puigdemont Kataluniako presidentearekin eta Oriol Junqueras Generalitateko presidenteordearekin batera.
Poliziaren txostenaren arabera, Sanchezek, Cuixartek eta Generalitateko kideek “erabakitzeko gaitasun bera” dute. Josep Lluis Trapero Mossoen nagusiak, berriz, egitasmo independentista betetzeko ardura izango luke, horien ustez.