Erabakitzeko eskubidea
Gure Esku Dagok kontsultak egingo ditu 13 udalerritan azaroaren 5ean
Agentziak | Erredakzioa
Gaur arte herri galdeketa antolatu dutenetatik handiena izango da Getxo, ia 80.000 biztanlerekin.
Getxon egin dute aurkezpen ekitaldia. Irudia: Gure Esku Dago
Gure Esku Dago erabakitzeko eskubidearen aldeko plataformak kontsultak egingo ditu azaroaren 5ean hamahiru euskal udalerritan, besteak beste, Getxon (Bizkaia).
150 lagunetik gora bildu dira larunbat honetan Algortako Portu Zaharrean, azaroaren 5eko galdeketan parte hartzeko deia egiteko herritarrei. Unai Elorriaga idazlea eta Bea Sever Chrysallis Euskal Herria-ko kidea izan dira bozeramaileak.
Gaur arte herri galdeketa antolatu dutenetatik handiena izango da Getxo, ia 80.000 biztanlerekin, plataformak ohar batean nabarmendu duenez.
Azaroaren 5ean beste hamabi herritan ere egingo dituzte herri galdeketak: Andoain, Areatza, Atxondo, Beizama, Berango, Erandio, Elantxobe, Galdakao, Mundaka, Ibarrangelu, Leioa eta Otxandio.