Generalitatea hauteskundeak deitzeko aukera aztertzen ari da, CUPen arabera

Espainiako Estatuak egindako mehatxuaren aurrean, Kataluniako Gobernuak bi aukera ditu mahai gainean: independentzia aldarrikatzea edo hauteskundeak deitzea.

Hala adierazi du Carles Riera CUPeko diputatuak, eta ohartarazi du bere alderdiak ez duela onartuko independentzia deklaratzea ez den beste ezer.

Testuinguru honetan Katalunian hauteskundeak deitzea "aukerarik okerrena" izango litzatekeela azpimarratu du.

"Prozesu independentista amaitzeko eta urriaren 1eko erreferenduma baliogabetzeko arma nuklearra izango litzateke hori; eta Kataluniako herritarrak makurraraztea ekarriko luke, hauteskundeak diktadura batean, demokrazia etenda dagoela, egingo liratekeelako", azaldu du.

Horrez gain, hauteskundeak deituz gero, Carles Puigdemontek CUPen babesa galduko lukeela ohartarazi du. "Erabateko bakardadean geratuko litzateke", erantsi du.

Espainiako Estatuak Katalunia "kolonia bat" izango balitz bezala erabiltzen duela salatu du eta, bere iritzian, hauteskundeak deitu arren, Mariano Rajoyren Gobernuak Konstituzioaren 155. artikulua bai ala bai ezarriko du, "beren helburua Katalunia zentralizatzea eta espainiartzea delako".

Alderantziz, Kataluniako Gobernuak independentzia deklaratu eta Kataluniako Errepublika aldarrikatzeko hautuaren alde egiten badu, "CUP alboan izango du eta edozein konpromiso, ardura eta arrisku hartzeko prest egongo da, inolako baldintzarik gabe", nabarmendu du.