Erkoreka, PSEren kritikez: 'Zilegi da txostenaren inguruan beste iritzi bat izatea'

Josu Erkoreka Eusko Jaurlaritzako bozeramailearen ustez, ez da garrantzitsua sozialistak torturei buruzko txostenarekin bat ez etortzea; izan ere, "ados ez egotea ez da gobernukideen arteko apurketa baten hasiera".

Eusko Jaurlaritzak Kriminologiaren Euskal Institutuarekin batera egindako txostenari buruz galdetu diote Erkorekari gobernu bileraren osteko ohiko prentsaurrekoan. Sozialisten kritikek koalizioko gobernuan arrakala sortu ote duten galdetuta, ezetz erantzun du eledunak. Horren aburuz, bi alderdiek bat egiten dute "Poliziaren giza eskubideen urraketak aitortu eta erreparatzeko konpromisoan".

Horrez gain, txostena zuzendu duen pertsonaren (Francisco Etxebarria auzitegiko mediku eta EHUko irakaslea) "izen ona" azpimarratu du, baita ikerketa lanaren "zorroztasun eta kalitate zientifikoa" ere.

Erkorekaren iritzian, "zilegi eta normala da alderdi ezberdinen artean irizpide eta iritzi ezberdinak izatea".