Katalunia
JxCATek legea aldatzeko eskaera egin du, Puigdemonten inbestidura ahalbidetzeko
Agentziak | Erredakzioa
Puigdemont presidente izendatzea ahalbidetuko duen erreformarako proposamena erregistratu dute Kataluniako Parlamentuan.
Junts per Catalunyak Bruselan egindako bilera. Artxiboko argazkia: EFE
Junts per Catalunyak ostiral honetan erregistratu du Kataluniako Parlamentuan Generalitateko Presidentzia Legea aldatzeko proposamena, Carles Puigdemont urrutitik presidente izendatzea ahalbidetzeko, Europa Press agentziak zabaldu duenez.
Ekimena bakarka aurkeztu du JxCATek eta premiazko prozeduraren bitartez tramitatu dezala eskatu dio Parlamentuko Mahaiari, hainbat hedabideren arabera.
ERCk ez du proposamena babestu. Esquerrak legegintzaldi berrirako "akordio zabala" nahi du eta itun horrek bi oinarri izan behar dituela uste du: Bruselan dauden Kataluniako Gobernuko kideak aintzat hartzea eta inbestidura eraginkor bat adostea.
ERCren iritzian, oso zaila izango da JxCATen erreformak aurrera egitea, Auzitegi Konstituzionalak berehala baliogabetuko duelako eta horrek Espainiako Estatuarekin enegarren auzia irekitzea ekarriko duelako.
Bestalde, azken egunonotan Elsa Artadiren izenak indarra hartu du eta bera izan liteke Generalitateko presidentegai alternatiboa. Junts per Catalunyako diputatuak Kataluniako Gobernu Exekutiboa zuzenduko luke, eta Puigdemont Errepublikako Kontseiluko presidentea izango litzateke erbestean.