Auzitegi Nazionala
Espejel epailea Altsasuko auzitik kentzea baztertu du Auzitegi Nazionalak
AGENTZIAK | ERREDAKZIOA
Concepcion Espejel magistratua Guardia Zibileko koronel batekin ezkonduta dago, Barne Ministerioak domina eman zion eta zenbait auzitatik kanpo utzi izan dute Alderdi Popularrari lotuta dagoelako.
Altsasuko gazteen senideak eta abokatuak. Artxiboko argazkia: EiTB
Auzitegi Nazionaleko Zigor-arloko lehen sekzioak baztertu egin du Concepcion Espejel magistratua Altsasuko auzia epaituko duen epai-mahaitik kentzea, akusatuen defentsek eskatu bezala.
Epaiketa apirilaren 16an hasiko da eta epai-mahaia Espejelek, Manuerla Fernandez Prado eta Eduardo Gutierrez magistratuek osatuko dute.
Epai-mahai horrek gaur kaleratu duen autoaren arabera, auzia epaituko duen magistratu bat kasutik erretiratzeko eskaerak egiteko epea 10 egunekoa da eta epe hori epai-mahaia osatuko duten magistratuen izenak jakinarazten direnean hasten da.
Autoak dio 2017ko ekainetik jakina dela Espejel izango zela Altsasuko auzia epaituko zuen magistratuetako bat, orduan izendatu zutelako Auzitegi Nazionaleko Zigor-arloko Salako eta lehen sekzioko presidente.
Alabaina, Altsasuko gazteen defentsek gaur goizean errefusatze-eskaeraren arabera, joan den otsailaren 13an jakin zuten Espejel epai-mahaiko kide izango zela.
Guardia Zibileko koronel batekin ezkonduta dagoelako eta Barne Ministerioak domina eman ziola kontutan hartuta, Espejel epailea auzitik erretiratzea eskatu zuten Altsasuko gazteen abokatuek.
Auzitegi Nazionaleko Zigor-arloko lehen sekzioak, baina, eskaera atzera bota du, epez kanpo egin dutela argudiatuta.
Horrenbestez, Espejelek epaituko ditu Altsasuko zortzi gazteak. Delitu terroristak leporatuta, 12 eta 62 urte arteko kartzela-zigorrak eskatzen dituzte haien aurka.
Aipatzekoa da Espejel beste auzi batzuetatik kanpo utzi zutela, hala nola, Gurtel eta Barcenas auzietatik, Alderdi Popularrari lotuta dagoelako.