Turullek Llarenari: 'Zuk egin nauzu preso politiko'

Jordi Turull Kataluniako Gobernuko presidentegai ohi eta kontseilari kargugabetuak "preso politiko" bihurtu izana aurpegiratu dio Pablo Llarena Auzitegi Goreneko epaileari. Gaineratu duenez, Auzitegi Gorenak ezin du "Generalitateko presidente izateko hautagaia nor izango den erabaki".

Jordi Turullek, Dolors Bassa kontseilari kargugabetuak eta Carme Forcadell Kataluniako Parlamentuko presidente ohiak agerraldia egin dute gaur Auzitegi Goreneko Pablo Llarena epailearen aurrean, prozesamenduaren berri izateko 'procés' delako sumarioaren barruan. Hirurak behin-behineko espetxealdian daude.

Turullen abokatuek jakinarazi dutenez, bere bezeroak adierazpen gogorrak egin ditu eta botere banaketa ez errespetatzea leporatu dio Estatuari.

"Espainiako Gobernuak auzipetuak publikoki zigortzen ditu eta epaileak presidente zein izan daitekeen eta zein ez erabakitzen du", adierazi du Turullek bere abokatuaren arabera. Bere ideia politikoei muzin egiteko asmorik ez duela eta preso politikoak espetxetik irtengo direla ere esan ei du.

Behin-behineko espetxealdian egoteagatik pertsona bat preso politiko bihurtzen ote den "zalantzak" omen zituen azaroan, baina Generalitateko presidente izateko hautagai zela espetxeratua izan ostean zalantza horiek desagertu egin zaizkiola azpimarratu du.

Horrez gain, behin-behineko espetxealdian politika egiten jarraitzen duten horiek bakarrik daudela ere aurpegiratu dio Llarenari.

Turullen aurretik, Dolors Bassa izan da deklaratzen lehena eta 15 minutu inguruz egon da epailearen aurrean —Turull 45 minutuz egon da—. Bassaren esanetan, Poliziak eta Guardia Zibilak urriaren 1ean izandako esku-hartzeak eragin zuen indarkeria.

Bassaren atzetik, hirugarrena eta azkena, Carme Forcadell agertu da epailearen aurrera. Ordu erdi inguruko agerraldian, bere eskubideen urraketa salatu du eta Auzitegi Gorenak kasu hau epaitzeko eskumena ote duen zalantzan jarri du.

Bere espetxealdiaren kontra azaldu da, haren esanetan, epaileak ezarritako kautelazko neurri guztiak bete baititu. Gainera, beste sumario batzuetan bere kontrako frogak biltzen ari direla jakiteak "babesgabetasuna" sortzen diola azaldu du.

Halaber, inoiz indarkeria bultzatu izana ukatu du.

Bestalde, Parlamentuko beste talde batzuekin batera independentziarako bide orria sinatu zuela onartu du, baina inoiz bete ez zenez, garrantzia kendu dio.

Gaurko agerraldiak amaituta, Llarena epaileak amaiera eman dio behin-behinean kartzelan dauden bederatzi auzipetuen zitazio errondari. Astelehenean Jordi Sanchez, Oriol Junqueras eta Jordi Cuixart agertu ziren Llarenaren aurrera eta atzo, ostera, Joaquim Forn, Raul Romeva eta Josep Rull.