Complutense unibertsitateak Casadoren Zuzenbide ikasketei buruzko datuak eskatu ditu

Madrilgo Complutense Unibertsitateak Pablo Casado PPren Komunikazio idazkariordearen Zuzenbide ikasketei buruzko informazioa eskatu dio unibertsitateari atxikitako Cardenal Cisneros hezkuntza zentroari, eta irregulartasun txikiena egotekotan "irmotasun handiz" jokatuko duela nabarmendu du unibertsitateak.

Gaur El Mundo egunkariak argitaratutako informazioaren arabera, Pablo Casadok Zuzenbide lizentziaturari zegozkion 25 ikasgaietako 12 lau hilabeteko epean gainditu zituen, 2007an Madrilgo diputatu gisa aukeratua izan eta denbora gutxira. Ez hori bakarrik, bestelako "erraztasunak" ere izan omen zituen.

Cardenal Cisneros hezkuntza zentroak ukatu egin du Pablo Casadori "lehentasunezko tratua" eman zaiola edo azterketarik egin gabe ikasgaiak gainditu dituela.

Zentroaren esanetan, "erabat faltsua" da inori estraofizialki ikasgaiak baliozkotu zaizkiola. "Cardenal Cisneros goi-mailako hezkuntza zentroan Complutense Unibertsitateko baliozkotze batzordeak onartu behar ditu baliozkotzeak", nabarmendu du.

Pablo Casadok, bere aldetik, ukatu egin du bere espedientean irregulartasunik daudela. Salatu duenez, argitaratutako informazioa "frogarik gabeko difamazioetan" oinarrituta dago.

 

La noticia sobre mi carrera de hace 15años es falsa y atenta contra mi honor. Se basa en difamaciones anónimas sin pruebas y calumnia a la universidad y sus profesores. No hay ninguna irregularidad en mi expediente y así lo demostré con toda la documentación. Basta ya de injurias

— Pablo Casado Blanco (@pablocasado_) 16 de mayo de 2018