Zigortua
Valtonyc rap-kantariak Belgikara alde egin du espetxean sartu baino lehen
Agentziak | Erredakzioa
“Desobeditzea legitimoa da eta betebehar bat Estatu faxista honen aurrean”, adierazi du rap-kantariak asteazken honetan, Twitter sare sozialean.
Valtonyc rap-kantaria. Artxiboko irudia: EiTB
Valtonyc Mallorcako rap-kantariak Belgikara alde egin du kartzelara sartzeko bezperan. Auzitegi Nazionalak 10 eguneko epea eman zion 3 urte eta erdiko espetxe-zigorra betetzen hasteko. Terrorismoa goratu, Koroari egindako irain eta mehatxuengatik zigortu dute.
TV3 telebistak ingurukoen iturriak aipatuz jakitera eman duenez, Josep Miquel Arenas Valtonyc-ek Estatutik alde egin du, Espainiako Justiziatik ihes egiteko asmoz.
“Desobeditzea legitimoa da eta betebehar bat Estatu faxista honen aurrean”, adierazi du rap-kantariak asteazken honetan, Twitter sare sozialean.
“Bihar da eguna. Bihar nire etxearen atea botako dute kartzelan sartzeko. Abesti batzuengatik. Bihar Espainia barregarri geratuko da berriro. Ez diet hain erraz jarriko”, idatzi du raperoak.
Mañana es el día. Mañana van a tumbar la puerta de mi casa para meterme en la carcel. Por unas canciones. Mañana España va a hacer el ridículo, una vez más. No se lo voy a poner tan fácil, desobedecer es legítimo y obligación ante este estado fascista. Aquí no se rinde nadie.
— Josep V. ¿¿ (@valtonyc) 23 de mayo de 2018
Asteazken eta ostegun honetan elkarretaratzeak deitu dituzte Madril, Bartzelona, Zaragoza, Vila-real, Girona, Alacant eta Castellon, Valtonyci babesa adierazteko, sare sozialen bidez elkartasun taldeek jakinarazi dutenez.
Estrasburgoko Giza Eskubideen Europako Auzitegiaren (GEEA) aurrean eskakizuna aurkeztu du abeslariaren defentsak, helegitea ebatzi bitartean espetxeratzeko agindua bertan behera uzteko. Prestatzen ari den helegitean, zigorra baliogabetzea eskatuko du rap-kantariaren abokatuak, bere adierazpen askatasun eta sormen eskubideak urratu dituztela argudiatuta.
Orain dela gutxi “guardia zibil putaseme bat” hiltzera eta “fiskalari lehergailu puta bat jartzera” animatu zuen Valtonyc-ek taula gainetik, Guardia Zibilaren elkarteek salatu dutenez.