Lledonersko espetxea
Ortuzar politikari presoak bisitatu ondoren: 'Lasai eta indartsu daude'
Agentziak | Erredakzioa
Kartzelatik atera ondoren, Rull, Turull eta Forn “bidegabe preso” daudela errepikatu du EBBko presidenteak.
Andoni Ortuzar eta Joseba Aurrekoetxea buruzagi jeltzaleak Lledonersko espetxean. Argazkia: EAJ
Lledonersko (Bartzelona) espetxetik atera ondoren, Jordi Turull, Joaquim Forn eta Josep Rull kontseilari ohi kartzelaratuak “lasai, indartsu eta Kataluniako politikari oso adi” daudela ziurtatu du Andoni Ortuzar EAJren EBBko presidenteak.
Buruzagi jeltzalea Lledonerseko kartzelara joan da, Joseba Aurrekoetxea EAJko Antolakuntza Arloko arduradunarekin batera, hiru politikariak bisitatzeko, goizean Diadako ekitaldian parte hartu ondoren, Bartzelonan.
Kartzelatik atera ondoren, Rull, Turull eta Forn “bidegabe preso” daudela errepikatu du Ortuzarrek Twitter sare sozialean. “Lasai, indartsu eta Kataluniako politikari oso adi aurkitu ditugu”, adierazi du.
“Beraientzako eta auziperatutako pertsona guztientzako bidezko epaiketa”, eskatu du EAJko presidenteak. “Epaiketa askatasun sententzia batekin bukatu daiteke soilik”, esan du.