DONOSTIA
Quim Torrak hitzaldia emango du arratsaldean Kursaalen, Gure Esku Dagok gonbidatuta
Eitb.eus
Erabakitzeko eskubidearen aldeko plataformak antolatu du ekitaldia, azaroaren 18an Gipuzkoako hiriburuan egitekoa den galdeketaren atarian.
Quim Torra, Generalitateko presidentea. Artxiboko argazkia: EFE
Quim Torra Kataluniako Generalitateko presidenteak hitzaldia emango du arratsaldean Donostiako Kursaal jauregian, Gure Esku Dago erabakitzeko eskubidearen aldeko plataformak gonbidatuta.
"Catalunya: burujabetza, demokrazia, askatasuna" izenburupean Torrak egingo duen hitzaldia 19:00etan hasiko da. Ekitaldia egingo den auditorioan gehienez ere 1.806 pertsona sartu daitezke. Hori dela eta, Gure Esku Dagok haien webgunean izena emateko eskatu die hitzaldira joateko asmoa duten pertsonei.
Azken 300 eserlekuak Generalitateko presidente @QuimTorraiPla|ren hitzaldirako! Zurea erreserbatu dezakezu, doan.
— Gure Esku Dago (@GureEskuDago) 13 de noviembre de 2018
Kataluniako egoera hurbiletik ezagutzeko aukera bihar @KursaalDonostia|n + @kepajunkera & @7sorginak amaieran!
¿ Izen-emateak: https://t.co/M4E8JBjOcV pic.twitter.com/ylkthTD4L8
Azaroaren 18an Gipuzkoako hiriburuan egitekoa den galdeketaren atarian antolatu dute ekitaldia. Guztira, 150.000 bat donostiarrek izango dute haien iritzia emateko aukera.
Donostia izango da hautetsontziak kalera aterako dituen lehen euskal hiriburua; Irunen, Balmasedan, Zallan eta Alonsotegin ere egingo da kontsulta.
Goizean, lehendakariak Torra hartuko du Ajuria Enea jauregian. Torra presidente izendatu zutenetik bi agintariek egingo duten lehen bilera izango da hori.