2017ko sanferminak
Nafarroako Auzitegi Nagusia: 'Ikurrina udaletxean jartzea legez kontrakoa izan zen'
Agentziak | Erredakzioa
Iruñeko Administrazioarekiko Auzien Epaitegiak hartutako erabakiaren aurka helegitea aurkeztu zuen Udalak, baina Nafarroako Auzitegi Nagusiak atzera bota du.
Ikurrina Iruñeko udaletxearen fatxadan. ETBren bideo batetik ateratako irudia.
2017ko uztailaren 6an, sanferminetako txupinazoan, Iruñeko udaletxearen fatxadan ikurrina jartzea “legez kontrakoa” izan zela berretsi du Nafarroako Auzitegi Nagusiak.
Iruñeko Administrazioarekiko Auzien 3. Epaitegiak hartutako erabakiaren aurka helegitea aurkeztu zuen hiriburuko Udalak, baina Nafarroako Auzitegi Nagusiaren Administrazioarekiko Salak atzera bota du. Ikurrina jartzea ordenamendu juridikotik at kokatu zuen Iruñeko epaitegiak.
Enrique Maya (UPN) zinegotziak eta Estatuko Abokatutzak helegitea jarri zutenean hasi zen auzia. Atarrabiako jaien txupinazoaren inguruan igorritako sententzian oinarritu da aretoaren erantzuna.
2003ko Ikurren Foru Legea baliogabetu ondoren, arau aplikagarri bakarra 39/2001 legea dela errepikatu du Nafarroako Auzitegi Nagusiak. “Horrek ez du Nafarroakoa ez den beste erkidego bateko bandera bat erakustea babesten eta, zalantzarik gabe, konkretuki ikurrina Nafarroan erakustea ez du babesten”.
Ikurren Foru Legea baliogabetu ondoren, eraikin publiko batean ofizialak ez diren beste banderak astintzeko aukera ematen duen araurik ez dagoela gogorarazi dute magistratuek.
Zentzu horretan, aurreko epai bat aipatuz Auzitegiak erantsi duenez, edozein alderdik edo talde politikok bere egoitzan nahi duen bandera erabiltzeko eskubidea ez da ukatzen.
Hala ere, gaineratu duenez, “eraikin publiko bat denean, hala nola udaletxea, balkoi nagusian, leihoetan edo fatxadan, hagan zein beste era batera bandera ofiziala ez den beste bat publikoki erakustea ez da posible”.