Elkarrizketa 'apurtzea' egotzi dio Generalitateak Espainiako Gobernuari

Elkarrizketa "apurtzea", Kataluniaren "gatazka politikoari" buruzko alderdien mahaia osatzeko negoziazioa uztea, eta "eskuinaren eta ultraeskuinaren" aurrean "ausardia falta" izateagatik amore ematea leporatu dio Kataluniako Generalitateak Espainiako Gobernuari.

Pere Aragones Generalitateko presidenteordeak eta Elsa Artadi Presidentetza kontseilariak Carmen Calvo Espainiako Gobernuko presidenteordeak esandakoari erantzun diote. Independentistek Gobernuak egindako proposamenak errefusatu dituztela eta Konstituzioaren markoaren aurkako autodeterminazio erreferenduma eskatze jarraitzen dutela esan du Calvok.

Generalitateko Jauregian emandako prentsaurrekoan, Artadik Sanchezen Exekutiboak "elkarrizketa uztea erabakitzea" eta "demokraziaren aurka daudenen aurrean amore ematea" deitoratu du.

Aragonesek azpimarratu duenez, Generalitateak negoziazio mahaian "eserita jarraituko du", PSOEk "elkarrizketan, negoziazioan eta demokrazian oinarritutako konponbide bat bilatu nahi izan arte". Hala ere, argi utzi du ez dutela onartuko hitz egiten hasteko baldintza gisa "proiektu politikoari uko egiteko" eskatzea.