Lehendakariak 'uzten' dion bitartean 'lanean jarraituko duela' esan du Darponek

Iñigo Urkullu lehendakariak "uzten" dion bitartean Osasun Sailaren buru izaten jarraituko duela esan du Jon Darpon Osasun sailburuak. "Lan zabala egiten dut Sailean, eta lanean jarraituko dugu", esan du astearte honetan sailburuak Gobernu bileraren osteko prentsaurrekoan.

Alderdi popularrak jakinarazi duenez, Urkulluk kargutik kentzen ez badu, Darponen aurkako gaitzespen-mozioa babestuko dute Legebiltzarrean. Fiskaltzak Osakidetzako lan-eskaintza publikoaren azterketetan filtrazio zantzuak izan zirela esan ostean eskatu dute alderdiek sailburuaren dimisioa.

"Lehendakariak horretarako baimena eman arte, lanean jarraituko dut. Beti izan da horrela", esan du sailburuak bere dimisioaren harira galdetuta.

Hala ere, gaitzespen-mozioa aurkezten dutenean, kargua utziko duen ala ez argitu gabe utzi du Darponek; asmoez hitz egin ohi ez duela esan baitu, eta "egunean" lan egitea gustatzen zaiola.

Bestalde, Josu Erkoreka Eusko Jaurlaritzako bozeramaileak esan duenez, aurreko legealdian lau ministro gaitzetsi zituzten, eta egungoan, Dolores Delgado Espainiako Justizia ministroa birritan gaitzetsi dute, eta "denek amaiera arte jarraitu dute beren karguan".