Aro berria
Amalur Alvarez eta Josu Etxaburu izango dira Gure Esku Dagoren bozeramaile berriak
Agentziak | Erredakzioa
Erabakitzeko eskubidearen aldeko plataformak Bilboko Euskalduna jauregian ekitaldia egingo du igandean 'etorkizuneko erronkak' azaltzeko.
Etxaburu eta Alvarez, <a href='https://www.youtube.com/watch?v=9FwQsx7x28s' target='_blank' title='vídeo promocional de GED'>GEDren promozio bideoan</a>.
Amalur Alvarez ikerlaria eta Josu Etxaburu irakaslea izango dira aurrerantzean Gure Esku Dago (GED) bozeramaileak. Erabakitzeko eskubidearen aldeko plataformak "aro berri" bati ekingo dio igandean, eta bertan aurkeztuko dituzte eledunak.
GEDk ohar batean adierazi duenez, Alvarez eta Etxaburu hastapenetik izan dira dinamikako kide, eta Angel Oiarbidek eta Zelai Nikolasek utzitako lekukoari helduko diote.
Zientzia juridiko eta politikoen arloko ikerlaria da Amalur Alvarez (Donostia, Gipuzkoa, 1988) eta irakaslea, Josu Etxaburu (Ondarroa, Bizkaia, 1961).
Gure Esku Dagok "aro berri bat" abiatuko du igandean Bilboko Euskalduna Jauregian egingo duen ekitaldiarekin. Martxoaren 31ko aurkezpenean, "egindako ibilbidea balioan jarri eta etorkizuneko erronkak mahai-gaineratuko" dituzte. GEDko kideez gain, hainbat eragile sozial, sindikal eta politikoetako ordezkariak ere izango dira bertan.