Roanne
Lorentxa Beyrie ETAko presoa baldintzapean aske uzteko prozesua eten dute
agentziak | erredakzioa
Terrorismoaren Aurkako Fiskaltzaren helegiteak gelditu du irteera, eta defentsa abokatuak gogor jo du neurri horren kontra, bere bezeroa begitan dutela iritzita.
Terrorismoaren Aurkako Fiskaltzaren helegiteak bertan behera utzi du Lorentxa Beyrie ETAko presoaren baldintzapeko askatasuna, William Bourdon bere abokatuak jakitera eman duenez.
Bi hilabeteko epean aztertu beharko dute helegite hori, abokatuaren esanetan. Zigorrak Betetzeko Auzitegiak atzo erabaki zuen Beyrie baldintzapean aske uztea, 18 hilabetez eskumuturreko elektroniko batekin eta mugitzeko mugekin.
Abokatuak uste du presoa begitan dutela, horregatik hartu dutela neurria, eta berretsi du bere bezeroak ez duela "inolako mesederik jaso" zigor arloan, "kontrakoa" baizik.
Gogorarazi duenez, justiziak baldintzapeko askatasuna ukatu zion aurreko aldian, eta zigor murrizketarik gabe ere, 2021ko urrian du espetxetik ateratzeko data.
Bourdonek, Auzitegian onartutako eskaeran, presoaren espediente "erabat eredugarria" azpimarratzen du, "kalitate handiko" proiektua duela, eta presondegian izan duen jarrera ere "eredugarria" izan dela.
Beyrie ETAko kide izateagatik zigortu dute Frantziako Estatuan, eta Roanneko espetxean dago urrunduta.