Inbestidura
JxCatek Pedro Sanchezen aurkako botoa emango du
Agentziak | Erredakzioa
"Eztabaida entzunda eta hautagaiaren aurrekariak ikusita, Pedro Sanchezen inbestidurari ez", esan dute Josep Rullek, Jordi Turullek eta Jordi Sanchezek.
Laura Borras JxCateko diputatua Kongresuan. Argazkia: EFE/ Kiko Huesca
Pedro Sanchez Espainiako jarduneko gobernuburu eta presidentegai sozialistaren aurkako botoa emateko asmoa du JxCatek, zenbait diputatuk Twitter sare sozialean iragarri dutenez.
Jaume Alonso-Cuevillas JxCateko diputatuaren hitzetan, Pedro Sanchezen inbestidurari ezezkoa ematea erabaki dute "aho batez", eta gauza bera egiteko eskatu dio ERCri.
Josep Rullek, Jordi Turullek eta Jordi Sanchezek kartzelatik honako txioa zabaldu ondoren esan dute: "Askok gutaz hitz egin dute, baina gurekin hitz egin gabe".
"Orain guk hitz egingo dugu: eztabaida entzunda eta hautagaiaren aurrekariak ikusita, Pedro Sanchezen inbestidurari ez", adierazi dute. Quim Torra Generalitateko presidenteak mezua birtxiokatu du.
Molts han parlat de nosaltres però sense parlar amb nosaltres.
— Josep Rull i Andreu ¿ (@joseprull) 22 de julio de 2019
Ara parlem nosaltres: escoltat el debat i amb els precedents que acompanyen el candidat, NO a la investidura de Pedro Sánchez.
Presó de Lledoners, 22/07/19 pic.twitter.com/qktVTDk4A2
Hiru espetxeratuen mezua Carles Puigdemont Kataluniako Gobernuko presidente ohiak ere partekatu du, eta erabakia babestu du: "Oso ondo".
Botoa Sanchezen hitzaldia eta Kataluniarentzako proposamenak entzun ondoren erabakiko zuela esan zuen JxCatek astelehen goizean, eta presidentegaiak hitzaldia bukatu ondoren eman du erabaki horren berri. Inbestidurako eztabaidak astearte honetan jarraituko du.