Inbestidura
PPk uste du Sanchezen eta EAJren akordioa egina dagoela
Agentziak | Erredakzioa
Amaya Fernandezek EH Bildurekin "harreman normalizatua" izatea leporatu die PSOEri eta EAJri, eta koalizioa "politikoki isolatzeko" deia egin die.
Amaya Fernandez PPren EAEko idazkari nagusia. Argazkia: EiTB
Amaya Fernandez EAEko PPren idazkari nagusiak uste du Espainiako Gobernuko presidenteak Andoni Ortuzar EAJren buruarekin egingo duen bilera "hutsala" izango dela, Gobernua Podemosekin osatzearen aldeko apustua eginda dagoelako, horren ustez. Gainera, EH Bildurekin "harreman normalizatua" izatea egotzi die PSOEri eta EAJri, eta koalizioa "politikoki isolatzeko" deia egin die.
Europa Pressek egindako elkarrizketa batean azaldu duenez, nazionalismoa "Alderdi Sozialista erabiltzen ari da, sozialistek boterea lehenesten baitute beste edozeren gainetik", eta EAJ Sanchezen "ahuldade horren jakitun" da, eta "Euskadin eta Nafarroan duen ibilbide subiranistaren alde eremu politikoa zabaltzeko aprobetxatzen du".
Gainera, abuztuan bertan PSOEren idazkari nagusiak eta Ortuzarrek Sabin Etxean egingo duten bilera "hutsala" izango dela esan du; izan ere, "euskal nazionalismoak onartua du, eta publikoki aitortu du, PSOEren eta Podemosen Gobernua nahiago duela, ontzat ematen dituela zerga igoeran oinarritutako eredu ekonomikoa eta pertsonentzat kaltegarriak diren neurri ekonomikoak".
"Nazionalismoak hori onartu du, eta bilera horretan egingo duten gauza bakarra da EAJk dagoeneko hartuta duen erabakia azpimarratu eta argi adierazi zein den bere eredua, euskal enpleguaren eta ekonomiaren defentsarekin zerikusirik ez duena. Agenda identitario nazionalistarekin du zerikusia", azaldu du.