'Proces' auziko epaia
Torrak bilera eskatu die Felipe VI.ari eta Sanchezi 'krisia'ri aurre egiteko
agentziak | erredakzioa
Generalitatearen presidenteak salatu du "demokrazia iraindu eta Kataluniako gizartea gutxietsi" dutela ebazpenarekin. Torrentek esan du "guztiak" zigortu dituztela.
Your browser doesn’t support HTML5 video
Quim Torra Generalitatearen presidenteak gutuna bidali die Felipe VI.a erregeari eta Pedro Sanchez Espainiako Gobernuko jarduneko presidenteari "premiazko" bilera eskatzeko, Auzitegi Gorenaren "ebazpenak ireki duen krisiaz hitz egiteko".
Torrak agerraldia egin du Generalitatearen egoitzan, kontseilariak, Roger Torrent Parlamentuko presidentea, Mahaiko kide batzuk eta Artur Mas presidente ohia aldamenean zituela, besteak beste.
'Proces'aren ebazpenari buruzko adierazpenak egiteko agerraldi horretan, Torrak iragarri du datozen egunotan Parlamentuan hartuko duela hitza gai hori jorratzeko, eta bihar goizean Gobernuak aparteko bilera egingo duela.
Torrak gutunez eskatu die bilera erregeari Sanchezi Kataluniak "bizi duen garai larria dela eta", pertsona "ohoretsu eta baketsuen" aurkako ebazpenaren berri izan ostean: "Zigorra iraina da demokraziarentzat, eta Kataluniako gizartearekiko mespretxua".
Torrak azpimarratu du erreferenduma antolatzea ez dela Zigor Kodean agertzen den "inolako delitua", eta "gertakariak eta kontaketa faltsua asmatu" dituztela "mendeku eta justiziaren aurkako ekintza bat" aurrera eramateko.
Testuinguru horretan, "errepresioaren amaiera preso politikoen eta erbesteratuen askatasuna" aldarrikatu du, "amnistia barne".
Torrak esan du gatazkak konpontzeko bidearen oinarriak "hitza, botoa eta askatasuna" izan beharko liratekeela, "mehatxua, zigorra eta espetxea ez baitira irtenbidea".
"Zigor Kodea herriaren nahiaren kontra erabiltzea diktaduraren ondarea da, ez demokraziaren ezaugarri propioa", ohartarazi du.
Torrak berretsi du Kataluniako errepublika lortzeko bidean lan egiten jarraituko dutela, “aitzakiarik gabe”, eta argi adierazi nahi izan du “errepresioak ez diola partida irabaziko” autodeterminazioari.
Horren harira, kartzelatutakoen “sakrifizioa” ez dela “hutsala” izango adierazi du, “justizia eta askatasun hazia” izango dela.
Gutunak erregeari eta Sanchezi
Felipe VI.a erregeari eta Sanchezi bidalitako gutunetan argudiatu du ebazpenean agertzen diren zigorrak ez direla justuak, eta U-1eko poliziaren kargak agindu zituenari ezarri beharko litzaizkiokeela.
“Gaur ebazpena jaso beharko luketenak egun hartako erasotzaileak izan beharko lirateke. Boto-paperak eskuetan inolako deliturik egiten ez zuten herritar baketsuen aurkako eraso indiskriminatua agindu zuena zigortu behar lukete”, azaldu du testu bera duten bi gutunetan.
Gainera, ebazpenak ez duela Kataluniako gatazka konpontzen, egoera okertzen duela eta irtenbidea urruntzen duela iritzi dion arren, hitz egiteko borondatea berretsi du: “Beti egon gara hitz egiteko prest gatazka politiko honen konponbidearen inguruan, gaur, sekula baino prestuago”.
Torrent
Bestalde, Roger Torrent Parlamentuko presidenteak esan du ebazpena "demokraziaren eta herritar guztien eskubideen aurkako erasoa" dela.
Twitterren adierazi duenez, "gaur denok zigortzen gaituzte, ez 12 pertsona soilik", eta askatasunak ere zigortzen dituzte.
Avui ens condemnen a tots, no només a 12 persones. Aquesta sentència és un atac a la democràcia i als drets de tota la ciutadania. Empresonen a la Presidenta del Parlament, al Vicepresident i als Consellers del Govern i a líders socials, però també a les nostres llibertats.
— Roger Torrent ¿ (@rogertorrent) October 14, 2019
Torrentek atsekabea energia bihurtzea eskatu du: "Indarkeria ezatik, defenda ditzagun oinarrizko eskubide eta askatasunak. Beti egin dugun moduan, eraso okerrenei aurre egiteko indarra eta inteligentzia nahikoa aurkituko digu, etorkizun eta esperantza eszenatokia eratzeko".