Parlamentuko Mahaiko Forcadellen kideak azaroaren 28tik epaituko dituzte

Kataluniako Parlamentuko presidentea zela Carme Forcadellek Ganberako Mahaian zituen hainbat kide azaroaren 28an hasiko dira epaitzen, Kataluniako Justizia Auzitegi Nagusiak zehaztu duenez, aldeen abokatuek beste data bat adostuta. Epaiketa Kataluniako Justizia Auzitegi Nagusian bertan egingo dute.

Izapide baten bidez, Auzitegiaren Areto Zibil eta Penalak adierazi du epaiketa hauen aurkakoa izango dela: Lluis Maria Corominas (PDeCAT), Lluis Guino (PDeCAT), Anna Simo (ERC), Ramona Barrufet (PDeCAT) eta Joan Josep Nuet (EUiA). Horiekin batera, Mireia Boya CUPeko diputatu ohia epaituko dute. Saioak azaroaren 28an eta 29an eta abenduaren 3an eta 4an egingo dituzte, goizez eta arratsaldez.

Epaiketa azaroaren 18tik 22ra arte zen egitekoa, baina atzeratu egin zuten; izan ere, defentsako bi abokatuk beste bista batzuk zituzten jarrita egun horietarako, aldez aurretik.

Proces auziko epaian, Auzitegi Gorenak 11 urte eta 6 hilabeteko kartzela-zigorra ezarri dio Forcadelli, sedizio delituagatik. Epaiaren arabera, "zeregin erabakigarria" izan zuen, "baliotasunik gabeko legaltasun paraleloa" sortzeko, Kataluniako Ganberako presidente zela, "bere leku pribilegiatuta baliatuz".

Forcadellen kideen eta Boyaren aurkako auzian, Fiskaltzak urtebete eta zortzi hilabeteko gaitasungabetzea eskatu du, eta 10 hilabeteko isuna (egunero 100 euroko kuotarekin), desobedientzia larrien delitu jarraitu batengatik.

Estatuko Abokatutzaren esku dagoen akusazio partikularrak, bere aldetik, 30.000 euroko isuna eta urtebete eta zortzi hilabeteko gaitasungabetzea eskatu ditu Corominasentzat, Guinorentzat, Simorentzat eta Barrufetentzat; Nuetentzat eta Boyarentzat, aldiz, 24.000 euroko isuna eta lau hilabeteko gaitasungabetzea eskatu ditu. Desobedientzia larria leporatzen diete guztiei.

Akusazio partikularrak (Vox) 12 urteko kartzela-zigorra, 108.000 euroko isuna eta gaitasungabetzea eskatu ditu sei akusatuentzat, bi delitu egotzita: talde kriminal bateko kideak izatea eta desobedientzia jarraitua.

Epaiketa, Kataluniako Justizia Auzitegi Nagusian

Fiskaltzaren kereila batzuen eraginez abiatu zen Mahaiko kideen aurkako auzia, eta Kataluniako Justizia Auzitegi Nagusian epaituko dituzte, auzi hau Forcadellen eta gainerako lider independentisten aurkako prozesutik bereiztea eta Kataluniako Auzitegira helaraztea erabaki baitzuen Gorenak.

Konstituzionalak bere aginduak saihestea ekar zezakeen edozein ekimen galarazteko agindu arren, Kataluniako Parlamentuak erreferendum baten aldeko ebazpenak eztabaidatzeko bidea ematea egozten diete Lluis Maria Corominas eta Lluis Guino Mahaiko presidenteorde ohiei, Ramona Barrufet (JxSí) laugarren idazkari ohiari eta Joan Josep Nuet (CSQP) hirugarren idazkariari.

2017ko irailaren 27ko independentzia-adierazpenaren ostean, JxCat eta CSQPeko mahaikideek Gorenera deitu zituzten deklaratzera, matxinada- eta sedizio-delituak eta diru publikoa bidegabe erabili izana egotzita, baita Erreferendum Legea eta Iragankortasun Nazionaleko Legea bideratzea ahalbidetu izana egotzita (Kataluniako Parlamentuak 2017ko irailaren 6an eta 7an onartu egin zituen lege horiek, baina Konstituzionalak indargabetu egin zituen gero).

Mireia Boy CUPeko diputatu ohia, bere aldetik, proces auzian inputatu zuen Gorenak; izan ere, berak aurkeztu zuen, bere talde parlamentarioaren bozeramaile gisa, Iragankortasun Legearen proposamena. Horren bidez, legezko testuinguru bat sortu zuten, Espainiakoaren ordez, urriaren 1eko erreferendumean independentziaren aldeko botoek garaipena lortuz gero indarrean sartzeko.