A10eko hauteskundeak
Hauteskunde Batzordeak espedientea ireki die Pedro Sanchezi eta Isabel Celaari
AGENTZIAK | ERREDAKZIOA
Hauteskunde epailearen arabera, jarduneko presidenteak "hauteskunde kutsuko adierazpenak" egin ditu eta "erakundeen baliabideak" erabili ditu elkarrizketa bat eskaintzeko.
Pedro Sanchez. Argazkia: EFE
Espainiako Hauteskunde Batzordeak (JEC) espedientea ireki du Pedro Sanchez Espainiako Gobernuko jarduneko presidentearen aurka, La Sexta telebista katean eskainitako elkarrizketa batean "hauteskunde kutsuko adierazpenak" egiteagatik eta ondoren transkripzioa Moncloaren webgunean publikatzeagatik.
Hauteskunde epailearen arabera, aipatutako elkarrizketak Hauteskunde Legearen 50.2 artikulua urratzen du, "erakundeen baliabideak" erabilita eginda zegoelako eta Espainiako Gobernuko Presidentetzaren webgunetik ere igorri zutelako.
Urriaren 17an, Hauteskunde Batzordeak Gobernuaren jarduneko kideak ohartarazi zituen, hauteskunde kutsuko adierazpenik ez egiteko. Hala egitekotan, zigor prozedura abiatuko ziela gaineratu zuen.
Batzordeak Isabel Celaa Espainiako Gobernuko jarduneko bozeramaile eta Hezkuntza ministroari ere ireki dio espedientea.