Eusko Legebiltzarra
Autogobernuari buruzko 'bigarren debate bat' egitea leporatu dio Otegik EAJri
agencias | redacción
Bere ustez, PSE-EE akordio berrian egoteak esan nahi du ez dela erabakitzeko eskubidea aitortzen, eta, beraz, EH Bildu izango litzatekeela kanpoan geratuko dena.
Arnaldo Otegi EH Bilduren koordinatzaile nagusia. Argazkia: Efe
Arnaldo Otegi EH Bilduren koordinatzaile nagusiak koalizio independentista baztertuta autogobernuari buruzko "bigarren debate bat" egitea leporatu dio EAJri; izan ere, Otegiren esanetan, hilabeteak daramatza adostasuna PSE-EEri ere zabaldu diotela "saltzen", eta horrek esan nahi du erabakitzeko eskubidea ez dela aitortzen.
Otegik, Donostian emandako prentsaurreko batean, kritikatu egin du jeltzaleak adostasunak zabaltzeaz eta beste alderdi batzuk autogobernuko lantaldeko akordioan sartzeko "urrats handiak" egin izanaz hitz egitea.
Izan ere, PSE-EEk testu berriarekin bat egiteak erabakitze eskubidea ez aitortzea esan nahi duela iritzi dio eta, ondorioz, EH Bildu izango litzatekeela adostasunetik kanpo geratuko dena.
"Bigarren debate politikoa egin dute, lehenengoa ez zitzaielako gustatu, eta arauak aldatu dituzte", adierazi du Otegik, EAJk eta EH Bilduk egindako akordioan Legebiltzarraren % 60 dagoela azpimarratu aurretik.
Buruzagi abertzaleak esan du agian EAJk "testuaren zuzenketa" gisa aurkez dezakeela "erabakitzeko eskubidea aitortzen duen gehigarria", baina PSE-EErekin egindako akordioan ez dela halakorik agertuko.
Otegiren iritziz, politikariek argi hitz egitea "merezi" dute herritarrek; horregatik, EAJri eskatu dio argi dezala erabakitzeko eskubidearen alde egingo duen ala Konstituzioaren barruan autogobernua erreformatu nahi duen.