Inbestidura
Junqueras: 'ERCk ezetz bozkatuko du, gobernuen arteko negoziazio mahairik ez badago'
Agentziak | Erredakzioa
ERCko presidenteak gatazkaren judizializazioarekin amaitzeko apustua egin du.
Oriol Junqueras epaiketaren une batean. Artxiboko argazkia: EFE
Oriol Junqueras ERCko presidenteak Lledonerseko espetxetik La Razon egunkariak gaur argitaratu duen elkarrizketa batean esan duenez, "denaz hitz egin dezakegun gobernuen arteko negoziazio mahai bat ez badago" bere alderdiak Pedro Sanchezen inbestidurari "ezetz" esango dio.
Junquerasen ustez, PSOErekin negoziatzea ez da negoziazio normala, "gobernuen arteko negoziazio mahaiaz hitz egiten da, gatazka politikoaz". Esquerraren jarrera bide politikoaren aldeko apustua egitea eta gatazkaren judizializazioarekin amaitzea da.
ERCko buruzagiarentzat "sozialisten teilatuan dago pilota, eta hirugarren hauteskundeak ere bai". "Ezetz bozkatuko dugu ez badago gobernuen arteko negoziazio-mahai bat non guztiaz hitz egin ahal izango dugun eta mahai horren balizko akordioak betetzeko egutegi bat eta mekanismo batzuk finkatuko ditugun", argudiatu du.
Bere ustez, "ERC oso argia izan da baldintzak ezartzerakoan. Ematen badira, birplanteatu dezakegu gure jarrera, baina gure botoa eskatzen dugun bezala negoziazio-mahai bat adosten ez bada, ezezkoa izango da. Ez gara inbestidura bat negoziatzen ari, gatazkari irtenbide demokratikoa bilatzeko mekanismoak baizik".
"Kataluniak autodeterminazioa eta amnistia eskatzen ditu, eta Estatuak proposamenen bat egitea espero dugu. Herritarrek bozkatzen dutenean ateratzen dena onartuko dugu", esan du Junquerasek; baina, konponbidea "hitz egitera eseri eta Katalunian hautetsontziak jartzea da", azpimarratu du.