Pandemia
Alderdiek ez dute akordiorik lortu lehendakariaren agerraldiaren inguruan
agentziak | erredakzioa
Formatuan egon da desadostasuna, eta datorren asteartean elkartuko da Mahaia berriro. Ostiralean Batzorde Iraunkorrak bilera egingo du EH Bilduren eta Elkarrekin Podemosen ekimenak eztabaidatzeko.
Batzorde Iraunkor telematikoa. Argazkia: Efe
Batzorde Iraunkorreko Mahaiak bilera egingo du datorren asteartean Iñigo Urkullu lehendakariak koronabirusaren kudeaketaz azalpenak emateko egin nahi duen agerraldia nolakoa izango den erabakitzeko; izan ere, gaur alderdiak ez dira ados jarri.
Batzorde Iraunkorra ostiral honetan elkartuko da, telematikoki, EH Bilduren hiru ekimen eta Elkarrekin Podemosen beste bat eztabaidatzeko. Koronabirusaren krisiari aurre egiteko neurriak izango dituzte eztabaidagai.
Baina lehendakariaren agerraldia noiz eta nola izango den ez dute adostu. Legebiltzarreko iturrietatik jakinarazi dutenez, formatuan dago arazoa, aurrez aurrekoa ala telematikoa. Aukera batek ere ez du denen babesa, eta beharrezkoa da, Legebiltzarreko abokatuen arabera.
Baina Batzorde Iraunkorraren saio horrek ez du lehendakariaren agerraldia soilik hartuko. Kulturaren sektoreari laguntzeko eta merkataritza bonoak sortzeko EH Bilduren bi proposamen ere eztabaidatuko dituzte.
Datorren asteartean beste bilera bat egingo du Batzorde Iraunkorreko Mahaiak, alderdien arteko desadostasunak konpontzeko eta hurrengo saioaren data jartzeko. Baliteke hilaren 24a izatea data hori.