Sanchezek ukatu egin du errege emeritua zigorgabea dela, eta Gonzalez defendatu du

Pedro Sanchez Espainiako Gobernuko presidenteak errege emerituari erreferentzia eginez esan duenez, "Espainian inor ez da zigorgabea", eta Felipe Gonzalezek GALekin duen harremana Kongresuan ikertzeko oposizioak egindako eskaeren harira, Estatu terrorismoa alde batera utzi du, presidente ohiaren ondarea defendatu du eta Moncloatik ateratzeko operazio politiko eta mediatiko bat antolatu zutela adierazi du.

Hala erantzun dio Sanchezek Gabriel Rufian ERCko bozeramaileak egindako galderari; izan ere, PSOEk uko egin dio Mekarako AHTa egiteko kontratuen esleipenean Juan Carlos I.a errege emerituak izandako papera eta Gonzalezen eta GALen arteko lotura ikertzeari.

Felipe VI.aren aitaren inguruan Sanchezek azpimarratu duenez, "Espainian inor ez da zigorgabea", eta Justiziari "independentziaz" lan egiten uztearen alde egin du, dagoeneko errege emeritua ikertzen ari baita.

Espainiako presidentearen hitzetan, Gobernuaren asmoa "Justiziari lan egiten uztea" da, "epaile eta fiskalen lana oztopatu gabe", eta "legegintzan inork ezin du epaile edo fiskal papera bere gain hartu", esan dio Rufiani.

"Errealitatea tematia da eta gezurtatu egiten zaitu", erantzun dio ERCko bozeramaileak, eta PSOEk Koroa, "izugarri opakua" den erakundea, ikertzeari uko egin diola aurpegiratu dio Sanchezi.

Ondoren, Gonzalezen eta PSOEren kontra egin du, GALekin duen lotura ikertzearen aurka agertu baitira, nahiz eta "informazio berriak" egon, CIAk desklasifikatu dituen paperei erreferentzia eginez.

Sanchezek ez du Estatu terrorismoa zuzenean aipatu, eta Gonzalezek hauteskundeak lau aldiz irabazi zituela gogoratu du, eta ia 14 urtez gobernatu zuela.

"Hor dago ondarea, Espainia demokratikoaren modernizatzaile handienetako baten historia", esan ostean, PSOEko diputatuen txalo zaparrada jaso du, baina Pablo Iglesias presidenteorde eta Podemoseko buruzagiak ez du bat egin haiekin, eta nahiago izan du paper bat eskuan izaten jarraitu, txalo egin beharrean.