Katalunia
Kataluniako hauteskundeak otsailaren 14an izango dira
E. G. | EITB MEDIA
Kataluniako Auzitegi Nagusiak duela astebete ezarritako kautelazko neurriak berretsi ditu, eta horrenbestez, hori izango da behin betiko data.
Kataluniako Parlamentua, hutsik. Argazkia: EFE
Kataluniako Auzitegi Nagusiaren Administrazio auzietarako salak lehengo lepotik burua. Gaur berretsi duenez, otsailaren 14an izango dira azkenean Kataluniako hauteskundeak. Kanpaina martxan dagoela hartu du erabakia justiziak.
Horrenbestez, Generalitateak hauteskundeak maiatzaren 30erako atzeratzeko dekretua bertan behera utzi du.
Sala eguerdian bildu da, eta joan den astean ezarritako kautelazko neurriak berretsi ditu. Hori horrela, bi pertsonak eta Parlamentuan ordezkaritza ez duten hainbat alderdik aurkeztutako helegiteak aintzat hartzea ebatzi du.