EAJren urteurren ekitaldia
Ortuzarrek EAJrekin sinatutako paktuak betetzeko eskatu dio Sanchezi
Agentziak | EITB Media
Euskadi Buru Batzarreko presidenteak esan du espainiar Gobernuko presidenteak "azeleragailua zapaldu" behar duela transferentziei, Bizitzeko Gutxieneko Errentari edota AHTaren gaiei irtenbidea emateko.
Andoni Ortuzar, EAJren 126. urteurreneko ekitaldian. Argazkia: EAJ
Andoni Ortuzarrek, EAJren Euskadi Buru Batzarreko presidenteak, berretsi du Pedro Sanchez presidentea ez dela ari jeltzaleekin 2019ko abenduaren 30ean sinatutako paktuak betetzen. Hala, esan du espainiar Gobernuko presidenteak "azeleragailua zapaldu" behar duela transferentziei, Bizitzeko Gutxieneko Errentari edota AHTaren gaiei irtenbidea emateko.
Ildo beretik, Ortuzarrek jeltzaleen botoak "doan" eskaini ditu, "Gobernu honi edo datorrenari", Estatutua bete, Ekonomia Ituna errespetatu eta "herrialde honi askatasunez erabakitzeko aukera" ematen zaion bitartean. Gainera, adierazi du bere alderdia gogaituta dagoela "xantaiagile, pirata eta argazkiak egiteagatik kobratzen duten Hollywoodeko izarrak" direla esaten dutenekin.
¿ @andoniortuzar: "Nola ez dugu #autogobernu gehiago exijituko ba? Pandemia honek ezer erakutsi badigu, hori da zerbitzu publikoak indartu behar ditugula. Gizarteko ahulenak zaindu behar ditugula. Horretarako tresna potente daukagu: autogobernua". #EAJren126urteurrena pic.twitter.com/NGPtzZBSof
— EAJ-PNV (@eajpnv) July 31, 2021
EAJren 126. urteurrenarengatik Bilbon egindako ekitaldian, EBBren presidentea haserre agertu da, Ekonomia Itunaren Batzorde Mistoan adostutakoaren ondorioz Pablo Casado PPren buruzagiak eta Alderdi Popularreko beste hainbat politikarik egindako "irainak" direla eta.
Bada, Batzorde Mistoan hitzartutakoa babestu du Ortuzarrek. Azaldu duenez, iragan ostegunean adostutako hiru zerga berriek bidea erraztuko dute. Politikariaren hitzetan, ostegunean "gai garrantzitsuak, teknikoak eta guztiz legezkoak jorratu ziren, duela hileak konponduta behar luketenak".
Azkenik, EEBren presidenteak berriz salatu du atzerapenak daudela espainiar Gobernuarekin 2019an adostutako hainbat akordio gauzatzeko.