Diada, datorren asteko elkarrizketa mahaiari begira

Independentismoak kaleak hartuko ditu berriro Diadan, Generalitatearen eta Espainiako Gobernuaren arteko elkarrizketa mahaia begiz jota, datorren astean batzartzekoa baita.

Koronabirus pandemiaren ondorioz iazko Diadak azken urteetako oihartzun txikiena izan ondoren, oraingoan normaltasun handiagoarekin ospatuko dute, nahiz eta oraindik covid-19ari eusteko murrizketek baldintzatu.

ANCk Bartzelonan deitutako manifestazioak bereganatuko du arreta, 'Lluitem i guanyem la independència' (Independentzia borrokatu eta irabazi dezagun) lelopean. Azken urteetan ez bezala ohiko martxa izango da. Aldez aurretik, mobilizazio masiboak eta estatikoak egin dituzte, toki zabalak betetzeko helburuarekin.

¿¿¿¿Aquests dies que corren molts cartells de la Diada, no et despistis, el que convoca a la mani de l'@assemblea és aquest pic.twitter.com/pk6allq0qj

— Assemblea Nacional Catalana (@assemblea) September 8, 2021

Governak pertsonak biltzeko debekuak kendu ditu ostiral honetan, eta horri esker manifestazioa egitea posible izango da. Mobilizazioa Urquinaona plazatik abiatuko da.

Via Laietanatik jaitsi, Espainiako Poliziaren Komisaria aurretik pasa eta Estacio de Françan bukatuko da. Bertan ekitaldia egingo dute. Elisenda Paluzie ANCko presidenteak, Jordi Cuixart Omnium Culturaleko buruzagiak eta Jordi Gaseni AMIko presidenteak hitza hartuko dute.

ERCko eta Juntseko buruzagi nagusiak manifestazioan izatea espero da, baita Pere Aragones Generalitateko presidentea, Governako kontseilari gehienak eta Laura Borras Parlamentako presidentea ere. Bitartean, CUPek Dolors Sabater Parlamentuko taldearen bozeramailea bidaliko du.

Mobilizazioa arrakastatzat jotzeko kopururik ez du zehaztu izan nahi ANCk. Beste urte batzuetako manifestazioekin alderatzerik ez dagoela uste du, pandemia testuinguru batean egingo delako, baina Paluziek ostegunean azaldu zuenez, "sei zenbakiko" talde bat biltzea espero dute. Koronabirus garaian Europako mobilizazio handienetako bat izatea nahi dute.

ANCren esanetan, independentzia herritarren mobilizaziotik borrokatuz eta erakundeen ekintzarekin lortuko da, eta horixe demostratu nahi du manifestazioak. Mugimendu soberanistaren "indarra" berriz demostratzeko balio behar duela uste dute Governak eta alderdi independentistek.

Hala ere, litekeena da elkarrizketa mahaiari begira dauden desadostasunak agerian uztea, independentismoa zatituta joango dela ematen baitu: mahaiaren aldeko apustu argia egin duen bakarra ERC izan da; Juntsek etengabe kritikatu du, nahiz eta parte hartu; CUPek ez du elkarrizketa estrategian sinesten, nahiz eta ERCrekin bi urteko tartea ematea adostu; eta ANC aurka agertu da.

Politikari presoei indultua eman ondoren aurreneko Diada izango da. Honenbestez, espetxeratu zituzten buruzagi independentistek lehen aldiz ekitaldietan parte hartu ahal izango dute askatasun osoz.

¿ Comença l'acte al Palau de Congressos de #Tarragona

Un acte de solidaritat amb totes les persones que han patit o pateixen repressió i que comptarà amb la participació de @jcuixart i diverses persones represaliades del Camp de Tarragona i les Terres de l'Ebre pic.twitter.com/bI9zLMWoSP

— Òmnium Cultural (@omnium) September 9, 2021

Horrela, horietako batzuek ekitaldietan parte hartuko dute. Omniumek antolatutako ekitaldian Cuixart izango da, "giza eskubide zibil eta politikoen aldeko borrokan mundu osoan aritutako pertsonekin batera". Era berean, Oriol Junquerasek ERCren ekitaldia hartuko du parte.

Ohikoa den bezala, larunbat honetan Diadako ekitaldi tradizionalak ere egingo dituzte, hala nola, erakunde, alderdi, elkarte eta sindikatuen lore eskaintzak Rafael Casanovaren monumentuan, goizeko lehen orduan.

Ekitaldi soberanistez gain, independentziaren aurkako alderdiek ekitaldiak antolatu dituzte Diadan. Horrela, independentistentzako jaia bihurtu dela salatu nahi dute, eta ez Kataluniako gizarte osoarentzako jaieguna.

Aragonesek batasuna eskatu du

Pere Aragones Generalitateko presidenteak batasuna eskatu du elkarrizketa mahaiaren atarian, eta erreferenduma defendatzeko konpromisoa azaldu du, "utziezina" delako.

Diadaren bezperan mezu instituzionala zabaldu du presidenteak Barztelonako Sant Pau aretoan. Parlamentako gehiengo independentista goraipatu du agintariak: "Errepresioaren amaieraren eta erreferendumaren aldeko gehiengo zabalagoa dago".

"Sekula lortu ez duen gauza bat egiteko zorian da Katalunia: Estatuarekin negoziazio bat zabaltzea, gatazka nola konponduko dugun ebazteko", ospatu du Aragonesek. Gainera, negoziazioaren emaitzak bozketa baten bidez herritarren babesa jaso beharko duela onartzen dute bi aldeek, gogorarazi duenez.

EH Bilduren ordezkaritza

EH Bilduren ordezkaritza batek Diadako ekitaldietan parte hartuko du larunbat honetan. "Kataluniako eragile independentistekin harremanak estutzeko" aprobetxatuko dutela azaldu du koalizioak.

Horrela, Bakartxo Tejeria Nafarroako bozeramaileak eta Garikoitz Mujika EH Bilduko zuzendari nagusiak ordezkaritza zuzenduko dute.

ANCk deitutako manifestazioan, Omniumek antolatutako ekitaldian eta Casanovaren lore eskaintzan parte hartuko dute koalizioko ordezkariek.