Elkarrizketa
Miren Gorrotxategi: "Energia enpresa publiko bat sortzea proposatuko dugu"
O.P. | Eitb Media
Elkarrekin Podemos-IUk Legebiltzarrean duen bozeramaleak azpimarratu du, euren helburua ezkerreko Gobernua osatzeko akordioa lortzea dela, "lehendakaria EH Bildukoa, Podemosekoa edo sozialista izan, hori da gutxienekoa".
Miren Gorrotxategi.
Miren Gorrotxategi Elkarrekin Podemos-IUk Legebiltzarrean duen bozeramaleak nabarmendu du koalizioak beti duela negoziatzeko "asmo zintzo eta proaktiboa" eta halaxe izango dela euren jarrera, beraz, aurrekontuak negoziatzeko orduan eta aurreratu du energia enpresa publiko bat sortzea proposatuko dutela negoziazio horretan.
Radio Euskadin gaur goizean egin dioten elkarrizketan esan duenez, Eusko Jaurlaritza aurrekontuen inguruan ematen ari den titularrak "zertxobait esajeratuak" diela uste du; izan ere, azaldu duenez, "13.000 milioi euroko langa jada gainditu da ekitaldi honetan bertan, ez legebiltzarreko aurrekontuaren bidez, baina bai Gobernuak egin dituen gastu-ahalmenaren handitzeen bidez, zifra hori gaindituz".
Gorrotxategik aurrekontuen negoziaketan egingo dituen proposamen garrantzitsuenetako bi azaldu ditu elkarrizketa.
Alde batetik, hezkuntza doako izatea defendatuko dute, "baita 0 eta 3 urte bitarteko haurrentzat ere", bozeramailearen iritziz, "haurren eta familien pobretzeari aurre egiteko ezinbesteko elementua baita".
Ohartarazi duenez, aurten % 6 egin du behera Haur Eskolen matrikulazioak, eta nabarmendu du, arrazoietako bat dela, hain zuzen ere, "zenbait familiek ezin dutela ordaindu".
Administrazioak, bere iritziz, familia guztiek haurrak eskolatzeko aukera izatea bermatu behar du, "are gehiago, etapa goiztiar hori funtsezkoa denean pertsonaren garapenean".
Negoziazioan aurkeztuko duten beste proposamena krisi energetikoarekin lotuta dago; "energia enpresa publiko bat sortzea proposatuko" dutela azaldu du. "Formula magikoa" ez dela onartu arren, "trantsizio klimatikoaren bidean herritarrei lagunduko" liekela uste du.
Gainera, Gorrotxategik bereziki azpimarratu du oligopolio energetikoa "xantaia" egiten ari dela, "botere gehiegi" duela, eta, beraz, "ezinbestekoa" dela hari "botere hori kentzea"
Ezker abertzaleak urriaren 18an egindako adierazpenaren harira, eta PSEk eta alderdi moreak berak egindako harrera onaren harira, Xabier Garcia Ramsdenek balizko ezkerreko gobernu bati buruz galdetu dio, eta Gorrotxategik erantzun dio, hain zuzen ere, 2019ko hauteskunde-kanpainako lelorik garrantzitsuenetako bat hain zuzen ere herritarrak kontzientziatzea izan zela, esanez "herri honetan aukera politiko bat dagoela, berrogei urteotan ezagutu dugunaz aparte, hain zuzen, ezkerreko hiru alderdiek osatutako ezkerreko gobernua". Gorrotxategik onartu duenez, "gero eta elementu gehiago daude eta bidea irekitzen ari da horretara iristeko".
Euren burua EH bilduko lehendakari bat babesten ere ikusiko ote luketen galdetuta, Gorrotxategik argitu du hori "hauteskundeen emaitzen eta alderdien arteko negoziazioen arabera" erabakiko litzatekela, baina azpimarratu du alderdiaren helburua "ezkerreko gobernu bat" lortzea dela, "lehendakaria EH Bildukoa, Podemosekoa edo sozialista izatea, hori gutxienekoa izango litzateke". Azpimarratu duenez, "garrantzitsuena gobernu akordioa lortzea izango litzateke, herritarren gehiengoak hautatzen duen bidetik doana, bide batez esanda".