Euskal Telebista
Garcia Adanero: "Ez genion inoiz esan UPNren zuzendaritzari baietz bozkatuko genuela"
Mikel Dominguez | EITB Media
UPNko diputatuaren ustez, ez zuen "inori" ziria sartu lan-erreformaren bozketaren aurretik, eta esan du bere alderdiaren eta PSOEren akordioaren berri prentsaren bitartez eta egun berean izan zuela.
Carlos Garcia Adanero. EITB Mediaren bideo bateko irudia
Carlos Garcia Adanero UPNren diputatuak ukatu du bere alderdiaren zuzendaritzari lan-erreformaren alde bozkatuko zuela esan zionik, Zuzendaritzak erabaki zuen moduan. "Idazkari nagusiari esan nion, baietz bozkatzeko argumenturik ez banuen, ez nuela alde bozkatuko", esan du.
Nafarroako alderdiaren Berme Batzordeak Garcia Adanero eta Sergio Sayas diputatuei bi urte eta erdiz militantzia etetea proposatu du, boto-diziplina urratzeagatik. Biek helegitea aurkeztuko dute.
Diputatuak azaldu duenez, bera eta Sayas ez zeuden alderdiko buruzagiekin ados, eta haiekin izandako bileran lan-erreformaren kontra bozkatzearen alde agertu ziren. Gainera, bere arabera, bileran "esan zen UPNren botoak erabakigarriak baziren, aldeko botoa PSOEk eta EH Bilduk harremanak etetearen ordez adostu behar zela". Hori ezinezkoa zela, hau da, "PSOEk ez zuela bidea aldatuko", baina, "jakina" zen Garcia Adanerorentzat.
UPNko politikariak ez du uste "inori" ziria sartu dionik, ez UPNren Zuzendaritzari ezta prentsari ere. Bozketa goizean egindako adierazpenei buruz hitz egin du. Esan duenez, "momentu horretan oraindik norbaitek deitzeko eta alde bozkatzeko eta PSOErekin lortutako akordioaren berri emateko itxaropena daukat", diputatuek eskatzen zutenez. "Deigarria da gaur egun oraindik ez ezagutzea UPNk eta PSOEk egindako akordioa", esan du.
Diputatuak esan duenez, ez da PPra joango, eta Nafarroan alternatiba izateko UPN "PSOEren oposizioa izan behar da".