barne hauteskundeak
EAko zuzendaritzak "primarioak alde bakarretik ezabatu" izana ukatu du
agentziak| eitb media
Iker Ruiz de Egino EAko bozeramaileak berretsi duenez, proposamena Batzar Nazionalean erabakiko dute, datorren astean. Gaineratu du bozketa telematikoa egingo dutela, covidak "barnealdeetan eta espazio itxietan" eragin dezakeen "kutsatze arrisku handiagoa" dela eta.
Iker Ruiz de Egino, EAko bozeramailea. Artxiboko argazkia: EITB Media
Iker Ruiz de Egino EAko bozeramaileak ukatu du alderdiko zuzendaritzak "primarioen aldebakarreko ezabatzea" egin izana, eta berretsi du Batzar Nazionalak hartu beharko duela tokiko asanbladetan eztabaidatutako proposamenaren inguruko erabakia. Gainera, azaldu du txostenen inguruko eztabaida eta bozketa telematikoak izango direla osasun egoeragatik, eta covidak "barnealdeetan eta espazio itxietan" eragin dezakeen "kutsatze arrisku handiagoa" dela eta.
EAko zuzendaritzak joan den larunbatean iragarri zuen alderdiko burua hautatzeko primarioak ezabatzea proposatuko zuela Batzar Nazionalean, eta eztabaida zein bozketak telematikoak izango zirela, otsailaren 20an aurrez aurreko ekitaldi batekin amaitzeko. Ondorioz, sektore kritikoak "aldebakarreko ezabatzea" salatu zuen, eta "aurrez aurreko" batzar bat aldarrikatu zuen, "hautesontziekin".
Igande honetan argitaratutako adierazpen batean, Ruiz de Egino penatuta azaldu da, alderdiko zuzendaritza, "beste behin, behartuta dagoelako afiliatu talde batek Eusko Alkartasunaren aurka esan dituen faltsukeriak ezeztatzera". Haren esanetan, "euren inguruko kideen artean gezurrak zabaltzean datzan estrategia" da.
Ruiz de Eginok ukatu du EAko zuzendaritzak "primarioak alde bakarretik ezabatu" izana, eta argitu du Batzorde Nazionalak "idazkari nagusia aukeratzeko aurreko formulara itzultzearen alde egiten duen proposamena onartu" zuela. Azaldu duenez, proposamen hori da "tokiko asanbladetan eztabaidatu ahal izan dena eta 75 zuzenketa jaso dituena, osoko zuzenketa bat barne".
"Orain proposamen horiek Batzar Nazionalean eztabaidatzeko garaia da, eta horrek erabaki dezala, subiranotasunez eta demokratikoki, EAko idazkaritza nagusia hautatzeko modua, horretarako baita EAko organo gorena", adierazi du.
Alderdiko bozeramaileak sektore kritikoari egotzi dio "bozketa telematikoari buruzko zalantza" sortu izana, EA "alderdi aitzindaria izan baitzen euskal politikan teknologia berrien erabileran".
Ruiz de Eginoren arabera, bide telematikoaren erabilera "erabat bat dator taldeko barne araudiarekin", estatutuek eta Antolakuntza eta Parte Hartze araudiek "jasotzen eta sustatzen baitute".