GERRA UKRAINAN
EBren erantzun bateratua eta irmoa espero du lehendakariak, Ukrainaren aurkako erasoaren aurrean
EITB Media
Eusko Jaurlaritzak erabateko gaitzespena adierazi du Ukrainan sortutako egoeraren aurrean, eta Ukrainako biztanleriarekin kezkatuta agertu da.
Iñigo Urkullu lehendakaria. Artxiboko irudia: Irekia
Iñigo Urkullu lehendakariak azaldu duenez, Errusiak Ukrainari egindako eraso militarraren aurrean Europar Batasuna erantzun "bateratua eta irmoa" adosteko gai izatea espero du.
Urkulluk Eusko Jaurlaritzaren "gaitzespen irmoa" agertu du, sare sozialen bidez, "nazioarteko legedia gutxiesten duen ekintza oso larri batengatik", baita Ukrainako biztanleengatik duen kezka ere.
"Espero dugu Europar Batasunak erantzun bateratua eta irmoa adostea, inguru horretan elkarrizketa eta egonkortasun baketsua berrezartzeko eta Ukrainako herritarren bizitza eta ongizatea babesteko", esan du.