Presoak
Gizarteratze plana onartzea eskatu dio Urkulluk ezker abertzaleari
Erredakzioa
EAJren presidenteak uste du "aurrerapausoa" dela. Bake prozesua "geldirik" egotearen errua "ETArena eta indarkeriaren erabilera justifikatu dutenena" dela esan du.
Iñigo Urkullu EAJren presidentea. Argazkia: EITB
Iñigo Urkullu EAJren presidenteak esan du ezker abertzaleak "pedagogia" egin beharko lukeela eta Gobernuak presoak gizarteratzeko iragarritako planak suposatzen duen "aurrerapausoa" aitortu.
Onda Vascan egin dioten elkarrizketa batean azaldu duenez, "ezin da esan" kartzela politika "adostu" denik, baina aitortu egin behar da, nahikoa ez badira ere, Rajoy pausoak ematen ari dela.
Urkulluren arabera, "ezker abertzaleak badaki kartzela politika indibidualizatua izango dela" eta Gobernuak emandako "pausoak" suposatzen duen "aurrerapausoa" onartu eta "pedagogia" egin beharko lukeela iritzi dio.
Bake prozesuari dagokionez, Urkulluk kritikatu egin du geldiuneen errua "batak besteari" egoztea, eta errudun bakarrak "ETA eta indarkeriaren erabilera justifikatu dutenak" direla azpimarratu du.
Buruzagi jeltzalearen arabera, "batzuetan geldirik gaudela dirudi" baina "lan egiten da" etengabe.