"Ziurgabetasunaren" aurrean, EAJren proiektu "argia eta garbia" defendatu du Egibarrek

Joseba Egibar EAJren GBBko presidenteak ohartarazi duenez, "egungo ziurgabetasunean dauden arriskuen aurrean, eta egoera politiko nahasiaren erdian, Euskadiko norabide politiko, ekonomiko eta soziala zehazteko eta gidatzeko proiektua du" Eusko Alderdi Jeltzaleak.

Entzunez Eraiki EAJk sustatutako entzute aktiboko ekimenaren barruan, larunbat honetan Donostian izandako saioetako baten amaieran egin ditu Egibarrek adierazpen horiek.

Buruzagi jeltzaleak azpimarratu duenez, EAJk lanean dihardu "Euskadi berri bat lortzeko, behar berriei erantzuteko gai izango dena eta horretarako ezinbestekoa da, hazkunde ekonomikoren eta justizia sozialaren eskutik, Euskadi burujabe bat eraikitzea".

"Zalantzaz beteriko une honetan, pandemiaren eta Putinen gerraren ondorioei aurre egin behar diegula, existitzen diren arriskuez ohartu behar gara: funtsean, desberdintasun sozialak, mota desberdinetako arrakalak eta giro politiko nahasia", adierazi du. Horren aurrean, EAJren "proiektu argia eta garbia" nabarmendu du, "identitate ezaugarri, balore eta helburu jakin batzuekin".

Egibarrentzat, garrantzitsua da euskal herriaren "identitatea defendatzea eta sendotzea". "Euskarak euskal herritar egiten gaitu, gorde eta garatu behar dugu, haren ezagutza eta bereziki haren erabilera", gaineratu du.

"Herri bezalako aitorpena eta herritar guztientzako aukera-berdintasuna proiektu abertzalearen zutabe nagusietako bi dira, funtsezkoak herri eta gizarte bezala gure etorkizuna berma dezagun", esan du.

EAJren eredua, bukatu du Egibarrek, "baloreetan eta eskubideetan oinarrituta dago, baina balore kolektiboak lehenetsiz, horrek herritarra, gizartea eta herria sendotzen baitu".