ETAko aparatu militarreko burua eta haren kidea atxilotu dituzte

ETAko ustezko bi kide atxilotu dituzte Cauna udalerrian, Frantziako hego-ekialdean, Espainiako eta Frantziako poliziek elkarlanean egindako operazioan, Barne Ministerioak aditzera emandakoaren arabera.

Terrorismoaren kontrako borrokako iturrien arabera, atxilotuak Oroitz Gurrutxaga Gogorza eta Xabier Aranburu dira. Gurrutxaga ETAko aparatu militarreko eta kide berriak lortzeko aparatuko arduradun nagusia da. Aranburu, berriz, Gurrutxagaren laguntzailea da. 

Operazioa 15:30ak aldera hasi dute SDAT unitate frantziarreko agenteek eta Espainiako Poliziako Informazio taldekoek.

Armak zeuzkaten
Terrorismoaren kontrako borrokako iturriek iragarritakoaren arabera, ETAko ustezko bi kideak lapurtutako auto batean zihoazen, matrikula faltsuekin. Atxilotu dituztenean pistola bat eta errebolber bat atzeman dizkiete. Biak Baionako polizia-etxean daude.

Bi atxiloketa horiekin, dagoeneko 15 atxiloketa egin dituzte ETAk ekintza armatuen behin-betiko etena iragarri zuenetik, 2011ko urriaren 20an.

Azken bi atxiloketak martxoan egin zituzten, orduan Jose Manuel Azkarate Ramos, 'Manu', eta Ibai Peña, Segikoa, atzeman zituzten martxoaren 27an.

Gurrutxaga, 2008tik ihes eginda
Oroitz Gurrutxaga ihes eginda izan da Poliziak Gipuzkoan, 2008ko apirilean, egindako operaziotik. Operazio horretan 12 pertsona atxilotu zituzten Auzitegi Nazionaleko Fernando Grande-Marlaska epailearen aginduz.

Atxilotuei Errenteriako PSE-EEko zenbait zinegotziren helbideak atzeman zizkieten. Auzitegi Nazionalak Gurrutxaga aurkitu eta atxilotzeko agindua eman zuen.

Aranburu, bilatuenen artean
Xabier Aranburu, bestalde, "Kresala" komandoko kolaboratzailea izan zen, Ertzaintzak 2010eko otsailean taldea desegin zuen arte.

2011ko otsailean, Guardia Zibilak terrorista bilatuenen zerrendan sartu zuen Frantziara ihes egin zuela jakin eta ETAk Frantzian zuen egitura klandestinoan sartu zela susmatuta.