Negoziazioa
PSNk Koldo Martinez Iruñeko alkate bezala babesteko aukera aztertuko du, "eskuineko gobernu bat saihesteko"
Agentziak | EITB Media
Elma Saiz hautagai sozialistak gainerako indar "aurrerakoiekin" hasi du bilera-sorta, EH Bildurekin izan ezik.
Ramon Alzorriz PSNko Antolakuntza idazkaria. Argazkia: EFE
Ramon Alzorriz PSNko Antolakuntza idazkariak azaldu duenez, "Nafarroako Gobernua osatzen duten indar progresisten artean, bozkatuenak gidatu beharko luke", baina Koldo Martinez Geroa Baiko hautagaia babesteko aukera aztertzeari ekin diote, Iruñeko Udalean "eskuineko gobernu bat saihesteko".
"Udalen eta Gobernuaren arteko desberdintasuna" talde guztiek ulertu dutela eta "parametro horietan negoziatzen" ari direla adierazi du Alzorrizek gaur, prentsaurrekoan.
Bitartean, Elma Saiz hautagai sozialistak gainerako indar "aurrerakoiekin" hasi du bilera-sorta, EH Bildurekin izan ezik.
Geroa Bai eta Zurekin Nafarroa koalizioekin Nafarroako Gobernua osatzeko negoziazioari dagokionez, PSNk eta Geroa Baik Nafarroako Parlamentuko presidente izan nahi zutela adierazi zuten ostegunean, lehen hartu-emanean.
Ildo horretan, Alzorrizek adierazi du "Alderdi Sozialista, Maria Chiviteren Gobernuaren lidergo horren barruan, hitz egiteko eta negoziatzeko prest" dagoela, eta "eskuzabala" izango dela "izan behar duen lekuetan".