DIPUTATUEN KONGRESUA
"Ekintza egiaztagarriak" eskatu ditu Puigdemontek, Kongresuko Mahaia aukeratzeko bozketaren aurretik
AGENTZIAK | EITB Media
Presioak presio, ez dela Juntsen jarrera aldatu nabarmendu du Kataluniako presidente ohi eta Juntseko eurodiputatu denak. Bestalde, BNGk baieztatu du PSOEren hautagaiaren alde egingo duela Diputatuen Kongresuko presidente izateko. Halaber, ERCk eta Juntsek talde propioa izatea babestuko du.
Carles Puigdemont, artxiboko argazki batean. EITB Mediaren artxiboko bideo batetik ateratako irudia
Espainiako Gorteak ostegun honetan osatuko dira, baita Diputatuen Kongresuko eta Senatuko Mahaiak ere. Kongresuko Mahaiari dagokionez, Mahaia osatzeko 24 ordu baino gutxiago falta direnean, dena airean dago oraindik.
Juntsek ostegun goizean egingo duen bileran erabakiko du zer bozkatuko duen Kongresuko Mahaiko kideak aukeratzeko bozketan. Bezperan, Carles Puigdemont Generalitateko presidente ohi eta Juntseko eurodiputatuak egiaztatzeko moduko ekintzak eskatu ditu bere taldearen botoa zein izango den argitu aurretik.
Sare sozialetan zabaldutako mezu batean adierazi duenez, presioak presio, Juntsen jarrera ez da aldatu. "Ez daukagu inolako konfiantzarik Espainiako alderdi politikoengan, eta promesek ez gaituzte berotzen, ezta hozten ere", gaineratu du.
Puigdemonten esanetan, "benetako gertakarietan oinarritutako mesfidantza" ez du akordio batek gutxituko, eta desadostasun batek ez du mesfidantza handitzea ekarriko.
Juntsek ostegun goizean erabakiko du zer egin Kongresuko Mahaiko bozketan. Juntsen zuzendaritzak 08:00etan egingo du bileta telematikoa, hain zuzen ere, Gorte Nagusiak eratzeko bilkura hasi baino bi ordu lehenago.
Bestalde, BNGk baieztatu du Francina Armingol PSOEren hautagaiaren alde egingo duela Diputatuen Kongresuko presidente izateko. Halaber, ERCk eta Juntsek talde propioa izatea babestuko du, horrek Talde Mistoa "arindu" egingo baitu.