Estrasburgoko Auzitegiak begi onez ikusi du Espainiak Pablo Hasel rap abeslariari ezarritako zigorra

Giza Eskubideen Europako Auzitegiak arrazoia eman dio Espainiari Pablo Hasel rap abeslariari 9 hilabeteko kartzela-zigorra ezartzeko, txio eta abesti batzuetan terrorismoa goratzea eta Koroaren eta Estatuko erakundeen aurkako irainak eta kalumniak egiteagatik.

Ostegun honetako epaian, Estrasburgon egoitza duen auzitegiak adierazi du musikariaren defentsak aurkeztutako helegitea "oinarririk gabekoa" dela, eta uste du Auzitegi Nazionalaren epaiak adierazpen askatasuna kontuan hartu zuela eta zigorra ez zela "neurrigabea" izan.

Erabakia behin betikoa da, eta aho batez hartu dute. Haselek Europako Auzitegira jo zuen, besteak beste, pentsamendu- eta adierazpen-askatasunerako eskubideak urratu zitzaizkiola iritzita.

Espainiako Auzitegi Nazionalak bi urteko kartzela-zigorra ezarri zion, baina Apelazio Salak 9 hilabetera jaitsi zuen zigorra. Salak zigorra murriztu zuen, legezko minimoa aplikatu behar zela iritzita, txioak ez zirelako "benetako arriskua" pertsonentzat, baina azpimarratu zuen ez zetozela bat adierazpen-askatasunarekin edo sorkuntza artistikoarekin, besteak beste, indarkeria eskatzen zutelako eta terrorismoa goratzen zutelako.