Hauteskundeak Katalunian
Gobernua osatzen saiatzeko zilegitasuna duela aldarrikatu du Puigdemontek, PSOEren kritiken aurrean
Agentziak | EiTB Media
Generalitateko presidente izateko Juntsen hautagaiak sozialistei gogoratu die Pedro Sanchez Espainiako presidenteak ere ez zituela hauteskundeak irabazi.
Carles Puigdemont (Junts), hauteskunde biharamunean. Argazkia: EFE
Maiatzaren 12ko Kataluniako hauteskundeen ondotik, gobernua osatzen ahalegintzeko zilegitasuna aldarrikatu du Carles Puigdemont Juntsen Generalitateko presidentegaiak, eta PSOEren kritikak "ulergaitzak" eta "arraroak" direla gaineratu du.
Puigdemontek gogora ekarri du 2006an Artur Masek irabazi zituela Kataluniako Parlamentua aukeratzeko hauteskundeak, 48 eserlekurekin, —PSCk igandean lortutakoak baino sei gehiago— eta ez zela presidente izan. Halaber, sozialistei gogoratu die Pedro Sanchezek agintzen duela Espainiako Gobernuan eta Jaume Collbonik Bartzelonako Udalean, gutxiengoan egon arren.
Orain Katalunian hori egitea ezbaian jartzea "ulergaitza" eta "arraroa" iruditzen zaio. Puigdemonten iritziz, Kataluniako Parlamentuaren babesa lortu dezakeela uste duen orok dauka Gobernua osatzen saiatzeko eskubidea. Ildo horretan, uste du "akatsa" dela "joko" horren onuradun izan direnen aldetik balizko gobernu horren zilegitasuna ukatzea.
Atzo, Juntsen buruzagiak iragarri zuen Kataluniako Gobernuko presidente izateko aurkeztuko dela uste baitu PSCk baino aukera gehiago izango lituzkeela bigarren bozketan inbestidura lortzeko.
PSCk irabazi zituen pasa den igandeko Kataluniako Parlamenturako hauteskundeak, 42 eserlekurekin. Junts izan zen bigarrena, 35 ordezkarirekin eta ERC hirugarrena, 20rekin.
L'any 2006, Artur Mas va guanyar les eleccions amb 6 diputats més del que ara té el PSC, però no va governar. L'any passat, Collboni va perdre les eleccions a l'Ajuntament de Barcelona i va ser alcalde gràcies a un pacte amb el PP, i té un govern en minoria. Pedro Sánchez va…
— krls.eth / Carles Puigdemont (@KRLS) May 14, 2024