Lehendakaria Gasteizko, Bilboko eta Donostiako alkateekin bilduko da asteartean, irailak 10

Imanol Pradales lehendakaria EAEko hiru hiriburuetako alkateekin bilduko da asteartean, irailak 10, eta kargua hartu zuenean abiatutako bilera-sortarekin jarraituko du.

Pradalesek Ajuria Enea Jauregian hartuko ditu bihar goizean Juan Maria Aburto eta Eneko Goia Bilboko eta Donostiako alkate jeltzaleak, eta Maider Etxebarria Gasteizko alkate sozialista.

Lehendakaria Arabako, Bizkaiko eta Gipuzkoako ahaldun nagusiekin batzartu zen uztailaren 1ean, instituzioetako ordezkariekin abiatu zuen bilera-sortaren baitan.

Gainera, Eudeleko ordezkaritza batekin bildu zen uztailean bertan, Esther Apraiz presidente eta Derioko alkatearekin, besteak beste.

Pedro Sanchez Espainiako Gobernuko presidentearekin ere hitz egin zuen udan, Ajuria Enean, hain zuzen ere, Gernikako Estatutua hizpide.

Aurreko astean, berriz, Maria Chivite Nafarroako Gobernuko presidentearekin elkartu zen, Iruñean.