ZERGA ERREFORMA
Adostutako zerga erreforma "anbizio handikoa" dela dio Anduezak, "gehien dutenek gehiago ordain dezaten"
EITB Media
Jeltzaleek eta sozialistek adostutako erreforma fiskala babesteko deia egin die PSE-EEko idazkari nagusiak oposizioko alderdiei, Bizkaiko Batzar Nagusietan salbu, Araban eta Gipuzkoan gutxiengoan agintzen baitute.
Eneko Andueza PSE-EEko idazkari nagusia, artxiboko irudi batean. Argazkia: EFE
EAJk eta PSE-EEk zerga erreforma adostu eta biharamunean, "anbizio handikoa" dela nabarmendu du Eneko Andueza PSE-EEko idazkari nagusiak, "gehien dutenek gehiago ordain dezaten". Halaber, beste alderdi politiko batzuek erreforma fiskala babestuko dutelakoan dago, Bizkaiko Batzar Nagusietan salbu, Araban eta Gipuzkoan gutxiengoan agintzen baitute.
X sare sozialean argitaratutako bideo batean, Andueza oso pozik mintzatu da akordioarekin: "Ni oso pozik nago emaitzarekin eta espero dut beste indar politiko batzuek bat egitea hiru lurralde historikoetan erreforma aurrera ateratzeko egin dugun negoziazio ahalegin honekin".
Euskadiko sozialisten buruaren arabera, EAJk eta PSE-EEk adostu duten erreforma fiskalak "zerbitzu publikoak indartu" ez ezik, "ekonomia eta enplegua hobetuko ditu".
Anduezaren esanetan, fiskalitate berriak gazteei lagunduko die "etxebizitza eta burujabetza eskuratzen, berdintasuna bilatzen eta trantsizio berdearen erronkari erantzuten".
Bidezkoa den zerga-erreforma adostu dugu gehien duenak gehiago ordain dezan. Gazteek etxebizitza eskuratzea erraztuko duena, berdintasuna eta kalitatezko enplegua bultzatuko dituena eta trantsizio berdearen erronkari erantzungo diona.#Herrigintza pic.twitter.com/qOtNOUp50L
— Eneko Andueza (@enekoandueza) October 31, 2024
Atzo EAJk eta PSE-EEk elkarrekin zabaldutako oharraren arabera, zerga erreformarako akordioak progresibitatea hobetzea eta EAEko ekonomia eta gizarte sarea indartzea ahalbidetuko du.