Richar Vaquero, Podemos Euskadiren koordinatzaile nagusi berria

Bizkaiko Zirkuluen bozeramaile Richar Vaquero hautatu dute Podemos Euskadiren koordinatzaile nagusi. Guztira, 402 boto (% 46,5) eskuratu ditu, alderdi moreak jakinarazi duenez. Hain zuzen ere, tarte txikia atera dio beste hautagaiari, Gipuzkoako Batzar Nagusietako Podemosen bozeramaile Miren Echevesteri, 385 boto lortu baititu.

Asteon, Vaquerok iragarri du, berak irabaziz gero, Errenteriko alkateorde Maite Gartzia izango dela alderdiko koordinatzaile laguntzailea.

Vaquerok Pilar Garridoren lekua hartuko du. Garridok ez zuen bere burua hautagai aurkeztu, azken hauteskundeetako emaitza kaskarrak tarteko.

Orain arte Bizkaiko Zirkuluen bozeramaile izan da Vaquero (Bilbo, 51 urte), eta 2023ko hauteskundeen ondotik, Elkarrekin Podemosen prokuradore izan da Bizkaiko Batzar Nagusietan.

Maisua eta psikopedagogoa da, eta masterra dauka Psikologia Klinikoan, gatazketako bitartekaritzan espezializatua.