SARE SOZIALAK
Bruselak ikerketa ireki dio TikTok sare sozialari, adingabeei ematen dien babesa aztertzeko
AGENTZIAK | EITB Media
Europako Batzordeak plataforma adingabeak behar bezala babesten ari den aztertu nahi du, baita gardentasun-baldintza berriak betetzen ari den ere.
TikTok aplikazioa erabiltzen ari den pertsona bat. Artxiboko argazkia: EITB Media
Europako Batzordeak ikerketa formala abiatu du astelehen honetan TikTok sare sozialaren aurka, adingabeak behar bezala babesten ari ote den aztertzeko eta Bruselak plataforma digitalei eskatzen dizkien edukien moderazioari buruzko gardentasun-baldintza berriak betetzen dituen ikusteko.
Batzordeak joan den irailean ere eskatu zion informazioa TikTok plataformari, zer neurri hartzen ari zen jakiteko, eta astelehen honetan ikerketa formala abiatzea erabaki du, ohar baten bidez jakinarazi zuenez.
Europar Batasunak iaz onartu zuen zerbitzu digitalen legeak beren sistema algoritmikoek erabiltzaileentzat kaltegarriak diren edukiak erakusten ez dituztela bermatzera behartzen ditu Interneteko konpainia handiak. Zehazki, Txinako sare sozialak zenbateraino sortzen duen mendekotasuna aztertu nahi du Bruselak.
Ildo horretan, Batzordeak ziurtatu du TikTokek erabiltzaileen adina egiaztatzeko eta adingabeek eduki desegokia eskura ez dezaten saihesteko erabiltzen dituen neurriak "zentzuzkoak, proportzionalak eta eraginkorrak ez izateko" aukera dagoela.
Era berean, TikTok plataformak akademiko independenteak algoritmoen funtzionamenduan sartzea ahalbidetzen duen eta plataformak sare sozialean ikusten diren iragarkiei buruzko gordailu bat sortu duen aztertu nahi du Europako Batzordeak.
Batzordeak ohartarazi du sare sozialaren aurkako kautelazko neurriak har ditzakeela, beharrezkotzat joz gero.