PPk irabazi ditu Europako hauteskundeak Espainian. 

EH Bilduk irabazi ditu hauteskundeak EAEn, eta PSNk Nafarroan: 

Botoen % 26,24 lortu ditu koalizio abertzaleak, eta PSE-EEren aurretik geratu da.

-EAJ hirugarren indarra da, bozen % 11,52 galdu baititu, 2019ko datuekin alderatuta, nahiz eta eserlekuari eutsi dion.

-PP da laugarren indarra EAEn, boto-emaileen % 11,49k babestuta, eta Sumar du atzetik (% 3,27). Podemosek botoen % 3,27 erdietsi du, eta Voxek % 2,68.

-Nafarroan, PSNk irabazi ditu hauteskundeak, bozen % 28,76 jasota, eta PP da bigarren indarra, botoen % 28,03rekin.

-Iparraldean, eskuin muturreko Bilgune Nazionala alderdiak irabazi ditu hauteskundeak.

Belgikako lehen ministro Alexander de Crook iragarri du dimisioa emango duela bere alderdiak izan duen porrotaren ondotik.

Ursula von der Leyen Europako Batzordeko presidenteak eta Europako Alderdi Popularreko (PPE) hautagai alemaniarrak garaipena ospatu dute.

Frantziako ultraeskuindarrak ''emaitza historikoak'' lortu ditu, Marine Le Penen hitzetan

Frantziako presidente Emmanuel Macronek Asanblea Nazionala desegin du, eta hauteskundeak deituko dituela iragarri du, gaurko emaitzak ikusita. Datorren ekainaren 30ean eta uztailaren 7an egingo dituzte hauteskundeak Frantzian.

Europako Alderdi Popularrak irabaziko lituzke hauteskundeak, eta lehen indarra izaten jarraituko luke, 181 eserleku lortuta, inkestek emandako lehen datuen arabera.

Eskuin muturrak garaipen argia lortu du Frantzian, botoen % 31,5 eta % 32,4 bitartean lortuta. Emaitza horrekin, Emmanuel Macron presidentearen alderdiak jasotako boto-kopurua bikoiztuko luke, lehen inkesten arabera.

20:00etan itxi dituzte hauteslekuak EAEn eta Nafarroan, eta, aurrez, 18:00etan itxi dituzte Iparraldean.

Hauteskunde egun honetan 20:00etan jakitera eman diren inkesten arabera, PPk irabaziko lituzte hauteskundeak Espainian, PSOEri oso tarte txikia aterata, eta PSOE izango litzateke bozkatuena Euskadin, EAJren aurretik, oso tarte txikiagatik, baita ere. Nafarroan ere PSOE izango litzateke bozkatuena, kasu honetan aise.

Alemaniako Batasun Demokrata Kristaua eta Batasun Sozial Kristaua batzen dituen koalizioak izan da garaile Alemanian, botoen % 29,5 jasota, inkesten arabera. Berdeen gainbehera —Alderdi Sozialdemokrataren eta Alderdi Liberal Demokrataren bazkideak— ere aurreikusten dute galdeketek.

Horien arabera, Alemaniarentzako Alternatiba alderdi ultraeskuindarra izango litzateke bigarren indarra, botoen % 16,4rekin, eta Olaf Scholz kantzilerraren SDP alderdia hirugarrena, bozen % 14 lortuta.

Nafarroan % 41,3koa zen parte-hartzea, duela bost urtekoa baino 14 puntu baxuagoa, mahaien % 96,86 zenbatuta.

Arabak izan du parte-hartze baxuena: 97.433 boto-emaile (% 38,29). 2019tik 10,54 puntu jaitsi da parte-hartzea.

Bizkaian, berriz, 375.362 pertsonak bozkatu dute (% 41,52). 2019tik 11,39 puntu jaitsi da parte-hartzea. 

Azkenik, Gipuzkoan, parte-hartzea % 40,18koa izan da, duela bost urtekoa baino % 12,91 baxuagoa. Guztira, 224.527 lagunek bozkatu dute.

Parte-hartzeak nabarmen egin du behera EAEn Europako Parlamentuko hauteskundeetan, duela bost urteko hitzorduarekin alderatuta. 18:00etan, % 40,55ekoa zen parte-hartzea, 2019an baino 11,77 puntu gutxiago (udal eta foru hauteskundeekin batera egin zituzten orduan).

Bi ordu geratzen dira hauteslekuak ixteko, eta oraingoz 439.991 lagunek bozkatu dute Euskal Autonomia Erkidegoan.

Estatu espainiarrean % 38,35ekoa zen parte-hartzea 18:00etan, 2019an baino 11,09 puntu baxuagoa. Orduko hartan, baina, udal eta foru hauteskundeak ere egin zituzten Estatuan.

2014ko datuekin alderatuta, berriz, 4,3 puntu igo da parte-hartzea.

Pirinio Atlantikoetan % 44,71koa zen parte-hartzea arratsaldeko 17:00etan. 2019an, % 43,99koa zen ordu berean. 

18:00etan itxi dituzte hauteslekuak Ipar Euskal Herrian.

Ipar Euskal Herriko herritarrek frantziar Estatuaren baitan aukeratuko dituzte euren ordezkariak. 38 zerrenden artean hautatuko dituzte 81 eurodiputatu, orain bost urteko hauteskundeetan baino bi gehiago. Ordubete baino gutxiago falta da Lapurdin, Behe Nafarroan eta Zuberoan hauteslekuak ixteko. 

Hauteskunde egunetan beti izaten dira irudi bitxiak. Bartzelonan, esaterako, drag queen bat izan dute presidente hautesleku batean. Batzuetan, data bereziekin bat egiten dute hauteskundeek; izan da, gaur, bere 50. urtebetetze eguneko kandelak hautesmahaian itzali dituenik. 

Portugalen, demokrazian lehen aldiz, portugaldarrak herrialdeko edozein tokitan bozka dezakete gaur hauteskundeetan, dagokien zentroa edozein dela ere.

Agintariek 2019ko abstentzio historikoa saihesteko saiakera izan da neurri hay, eta badirudi, oraingoz funtzionatzen ari dela: gaur eguerdian parte-hartzea %14,48koa zen Portugalen, eta duela bost urte, berriz, % 11,56koa izan zen.

Igande honetako hauteskunde egunaren lehen zatia normaltasunez eta gorabeherarik gabe igaro da Europar Batasuneko herrialdeetan, eta ez da gauza makala, izan ere, 370 milioi europarretik gora baitaude botoa ematera deituta Europako Parlamentuko 720 diputatuak aukeratzeko.

Diputatu horien erdiak baino gehiago (375) bost estatu kideetako herritarrek aukeratzen dituzte, biztanle gehien dituzten bostek, hain zuzen: Alemaniak 96 eserleku aukeratzen ditu, Frantziak 81,Italiak 76, Espainiak 61 eta Poloniak 53.

Aldiz, eserleku gutxien dagozkienak, biztanle gutxien dituzten herrialdeak dira: Malta, Zipre eta Luxenburgo, seina eserlekurekin.

Lehen parte-hartze datuak: 

EAEn 14:00ak arteko parte-hartzea % 29,32koa izan da (2019an baino % 7,55 gutxiago). 

Araban, parte-hartzea % 27,76koa zen (-%6,57); Bizkaian, % 29,58koa (-%7,15), eta, Gipuzkoan, % 29,63koa (-%8,63).

Nafarroan hautesleen % 30,77 bozkatzera joanak ziren 14:00ak bitartean (- % 8,27). 

Espainian oro har, 14:00ak arteko parte-hartzea  % 28,01koa zen (2019an ordu berean baino % 6,74 gutxiago).

Andoni Ortuzar EAJko EBBko presidenteak ohartarazi duenez, eskuin-muturra eta ezker-muturra Europa gutxitzeko intentzioz dabiltza eta, horren aurrean, "Europa batuago, indartsuago eta demokratikoago baten alde'' bozkatzera joateko deia egin du Ortuzarrek.

.

Alba Garcia Sumarren EAEko ordezkariak espero du partehartzea "altua" izatea, "une garrantzitsua" delako Europan eta Estatuan.

Horren harira, eta "eskuin muturraren gorakada"z ohartarazi ostean, uste du ezinbestekoa dela jendea "mobilizatzea, ezin baititugu demokrazia eta gure eskubideak emantzat hartu".

Arnaldo Otegi EH Bilduren koordinatzaile nagusiak "nazioa defendatzen duten ezkerreko euskal herritar subiranista eta anifaxista" gisa bozkatzeko deia egin du, "PP-Voxe at faxistak mendean hartzeko aukera handia" dagoelako.

Pilar Garrido Podemos Euskadiren koordinatzaile nagusiak bakearen ala gerraren aldeko Europaren artean aukeratzeko deia egin die euskal herritarrei: "Bake eta eskubideen Europa bat edo gerrara eramango gaituen eta sufrimendua eta eskubideen urraketa ekarriko duen Europaren artean aukeratu behar dugu".

Oihane Agirregoitia EAJren hautagaiak esan du Europar Batasun "bateratu eta indartsua" behar dela, besteak beste, "berrindustrializaziorako gaitasuna" lortzeko.

Maria Chivite Nafarroako Gobernuko presidenteak esan du espero duela bihar "ez esnatzea iragan nostalgiko batean, baizik eta itxaropenez eta aurrerapenez betetako etorkizunean".

Idoia Mendia PSE-EEren Europako hauteskundeetarako hautagaiak azpimarratu du hauteskundeen emaitzen araberakoa izango dela "Europar Batasunaren etorkizuna", eta "masiboki bozkatzeko" deia egin du.

Bilboko Miguel de Unamuno eskolan eman du botoa hautagai sozialistak, eta ohartarazi du "EBren hauteskunde garrantzitsuenak" izan daitezkeela hauek.

"Historiako gurutzebide batean gaude, eta gaurko emaitzaren araberakoa izango da Europar Batasunaren etorkizuna. Espero dut kanpainan jendea ohartuko zela, eta gaur masiboki joango dela bozkatzera", azaldu du.

Bere esanetan, emaitzek esango dute Europar Batasunak "demokraziaren, kohesio sozialaren eta batasunaren itsasargi" izaten jarraituko ote duen, edo "guztia eraisteko arriskua" dagoen.

Carlos Iturgaiz PPren Europarlamenturako hautagaiak esan du Europaren etorkizuna ez ezik, "Espainiaren oraina eta etorkizuna" daudela jokoan.

Iturgaiz 24.a da PPren zerrendan, eta Getxoko Areeta auzoan eman du botoa. Hedabideen aurrean, bozkatzeko deia egin die horretarako asmorik ez dutenei, egunerokoan eragina duten erabakiak hartzen direlako Europan.

Iñigo Urkullu jarduneko lehendakariak Euskadik bere tokia izango duen Europa "indartsua" eskatu du.

Pernando Barrena EH Bilduren Europarlamenturako hautagaiak bozkatzeko deia egin du, zeren "ez bozkatzeak lekua ematen baitie eskuin muturreko alderdiei eta alderdi atzerakoiei".

Barrenak Berriozarren eman du botoa, alkatea eta koalizioko beste kide batzuk alboan zituela.

Botoa eman ostean azaldu duenez, "eskuin muturreko indarrek leku hori beteko dute gure eskubideak urratzeko".

"Gaur bozkatzeak garrantzia handia du, zeren Europa urrun dagoela dirudien arren, egunerokoari eragiten dioten erabaki asko Europan hartzen dira", adierazi du "botoa eman ala ez zalantzan" daudenei begira.

"Garrantzitsua da eskuin-muturreko indarrei, botoaren bitartez, aurre egiten jarraitzea Iruñean eta Nafarroan egin dugun moduan. Botoa emateko eguna da, baina baita borrokarako eguna ere", gaineratu du.

Javier de Andres PPren EAEko buruak botoa ematera animatu ditu herritarrak Europak "aldaketa" behar duelako.

"Parlamentuan, Diputatuen Kongresuan, onartzen diren legeen % 70a Estrasburgon eta Bruselan onartzen dira, beraz, garrantzia ikaragarria du gaur Espainian eta Europan erabakitzen denak", adierazi du Sanchezek komunikabideen aurrean Moncloako barrutian botoa eman ostean.

Pedro Sanchez Espainiako Gobernuko presidenteak ere eman du botoa. Madrileko hautesleku batera joan da Begoña Gomez emaztea, polemikaren erdigunean dagoena, alboan zuela.

Iñigo Urkullu jarduneko lehendakariak jada eman du botoa Durangoko hauteslekuan.

Nafarroan ere normaltasuna nagusi milioi erdi herritarrek botoa eman ahal izateko mahaien osaketan.

Horixe jakinarazi du Espainiako Gobernuak Nafarroan duen Ordezkaritzak, eta gaineratu du pankartaren bat kendu dutela hauteslekuren batean.

Bitxikeria bezala, botoa ematera joan den lehenengo pertsonetako batekin osatu behar izan dute mahairen bat, kide bat falta zelako.

Gogorarazi behar da boto zenbaketa, ohikoa den legez, hauteslekuak ixten dituztenean egingo bada ere, 23:00k arte, Italian hauteslekuak ixten diren arte, ez dela datu ofizialik zabalduko. 

Horrez gain, Europako Parlamentuak proiekzioak argitaratuko ditu 20:15ean, 23:15ean eta 01:00ean.

Aparteko gorabeherarik gabe ireki dituzte Arabako, Bizkaiko eta Gipuzkoako 721 hauteslekuak 1.791.167 boto emailerentzat.

Eusko Jaurlaritzaren Segurtasun Sailak jakitera eman duenez, normaltasuna izan da nagusi hauteskunde egunaren hasieran, egun gris eta euritsu honetan.

09:00etan ireki dituzte hiru herrialdeetako 2.689 mahaiak, eta 20:00ak arte egongo da botoa emateko aukera.

EAEn 8.067 presidente eta bokal izango dira hauteslekuetan, eta 16.134 ordezko ere deitu dituzte lehen ordurako.

Hegoaldeko hauteslekuak ere irekita, 2,5 milioi herritar inguruk dute jada Europako hauteskunbdeetan parte hartzeko aukera Euskal Herri osoan.

Alemanian, parlamentari gehien aukeratzen den estatuan (96), hauteslekuak irekita daude 08:00etatik, eta ia 61 milioi herritar daude parte hartzera deituta. CDU kontserbadorea da faborito, inkestek % 30eko babesa ematen baitiote, eta atzetik du AfD eskuin-muturreko alderdia, % 14tik % 20ra arteko boto-asmoarekin. 

Gainera, Europako hauteskundeekin batera antolatu dituzte bozak Baden-Württemberg, Brandeburg, Mecklemburg-Antepomerania, Renania-Palatinado, Sarre, Saxonia eta Saxonia-Anhalt estatu federatuetan, eta horrek eragina izango du partehartzean.

Ireki dituzte hauteslekuak Iparraldean, eta 250.000 inguru herritarrek 38 hautagaitzaren artean aukeratu ahal izango dute 18:00ak arte.

Espainiako Ikerketa Soziologikoen Zentroak (CIS) Europako hauteskundeei buruz egin duen azken inkestan ere PSOE jotzen zuen garaile, % 33,2ko babesarekin, baina PP % 30,5era gerturatuta, 2,7 puntura.

Orain Errepublikakek (EH Bildu kide den koalizioa) % 4,1eko babesa jasoko luke, eta Europa Solidarioaren Aldeko Koalizioak (EAJ eta Geroa Sozialberdeak daude) % 1,3koa.

Eduki honetan duzue Europako hauteskundeei buruz jakin beharreko guztia: 

Europako Parlamenturako hauteskundeak: Zer da jakin behar duzuna?

Bost urtean behin gertatzen den legez, Euskal Herri osoan izango dira hauteskundeak, Europako Parlamentu berria nortzuk osatuko duten erabakitzeko bozak egingo baitira Europar Batasuneko estatu kide guztietan.

08:00etatik 18:00ak arte, Ipar Euskal Herriko 250.000 inguru herritar botoa ematera joan ahalko dira, eta Hegoaldekoen kasuan, 09:00etatik 20:00etara 21 hautagaitzaren artean erabaki beharko dute 2,3 milioi herritarrek, Espainiako Estatu osoa hartzen duen barruti bakarrean lehian arituko diren guztien artean.

Iparraldean, berriz, 38 hautagaitza egongo dira aukeran. 81 diputatu aukeratuko dituzte, ordezkari gehien bidaltzen duen bigarren estatua baita Frantzia, Alemaniaren atzetik (96).